736
Агын Үзөөн нютагһаа гарбалтай мэдээжэ уран зохёолшо Чимит-Рыгзэн Намжиловай түрэһөөр 95 жэлэй ой һая гүйсэбэ. “Байгал” сэдхүүлэй ахамад редактораар Никифор Рыбкогой удаа хүдэлһэн, “Буряад үнэнэй” таһагые даагшаар, Буряадай номой хэблэлдэ редактораар, Монголдо ТАСС-ай сурбалжалагшаар ажаллаһан үргэн ниитэ ажал ябуулгатай бэлэй.
Бэеэр агдам томо, баруун тээшээ хэлтын һагад гэшхэлдэг, абар-табар буржагар үһэтэй, улаа татаһан шарайтай хүн һэн. “Байгал” сэдхүүлһээ гараад, Ленинэй үйлсээр үгсэжэ ябахадань уулзашахабди. Заатагүй тогтожо хөөрэлдэхэ, залуу заахан гэжэ голохогүй. “Зай, Галя, шүлэгөө хэр бэшэнэш даа? “Үнэнэйш” ажал зайгүй юм даа. Теэд забһарынь олоод лэ бэшэхэл болоо гүбши даа”, – гэжэ нюдэнэйнгөө зузаан шэл ялалзуулан байжа хэлэхэ. Эдэ үгэнүүдынь мүнөө илангаяа удхатайгаар, сэнтэйгээр һанагдадаг.
...Наһанайнь нүхэр Ханда-Цэрэн Балдановна дурасхаалынь мүнхэлхын түлөө бурхандаа ябатараа шууд оролдоо юм. Уран гартай эхэнэр байһан, дачынгаа гэр өөрөө шэмэглэн урладаг байгаа. “Чимит-Рыгзэниинь хадааһа һарбайгшань лэ байгаа юм” – гэлдэн шоглохо нүхэдынь.
Теэд Ханда-Цырен Балдановна наһанайнгаа нүхэрэй уран үгын эзэн байһандань үнэхөөр сэгнэдэг, хүндэлдэг бэлэй. 2000 ондо “Буряад үнэндэ” “Алтан үлгы” гэһэн номыень оролдосоо гарган хэблүүлээ һэн. 90 наһандаа дүтэлһэн хүгшөө үдэрөө дүүрэн эсэлтэгүй редакцида һууха.
“Чимит-Рыгзэмни Хяагтада түрэл садандаа хүбүүн боложо түрөө юм. Түһөөнь тон адли”, - гээд, Москваһаа ерэхэ бүхэндөө Хяагта руу бэлэгтэй – сэлэгтэй ошодог заншалтай болоо һэн. “Яһала томожоо, шарай ороо. Намаяа таниһандал нам тээшээ гараа арбалзуулан зүдхэнэл”, - гэһээр олзуурхан ерэдэг бэлэй.
