Эрмэлзэлтэй Эрдэм

Эрдэм эдир жаахан байхаһаа хойшо наадаха дуратай байһан юм. Хяагта хотын 4-дэхи дунда һургуулиин шаби ябаад, сагаа тааруулжа шадаад, барилдаанай болон футболой секцинүүдтэ ябагша һэн.

- Нэн түрүүн хорёо соогоо олоороо сугларжа наададаг һэмди. 4-дэхи класста һурахадаа, Виктор Дабаевич Анчиковай ударидалга доро футболоор һорилго хэжэ эхилээб. Заримашуулда адли һургуулиһаань ерэһээр, сүүмхэеэ холо шэдээд, наадахаяа гүйжэ ябадаггүй байгааб. Юуб гэхэдэ, гэртэхимни заал һаа эдеэлүүлээд, гэрэймни даабари хүүлээд, газаа тээшэнь табигша бэлэй. Хэды тиигэбэшье хэнһээшье урид стадион дээрэ ерээд, бүмбэгөө сохижо байдаг һэм, - гэжэ Эрдэм Галданов түрүүшынгээ алхамуудые һанан дурсана.

Хяагта хотын болон аймагай футболой мүрысөөнүүдтэ Эрдэм түрүүшынгээ медальнуудые абаһанаа мэдүүлнэ. 7-дохи классай һурагша ябаад, Улаан-Үдэдэ үнгэргэгдэһэн уласай түрүүшын мүрысөөндэ ошожо, хүрэл медаляар шагнагдаа.

Хажуугаарнь Эрдэм Галданов барилдаанай хибэс дээрэ нэгэтэ бэшэ амжалтануудые туйлажа, олон медаль, грамотануудта хүртэһэн намтартай. Түрэл Хяагтадаа дунда һургуули дүүргэжэ, бэлигтэй барилдааша хүбүүндэ физкультурын багша, һоригшо мэргэжэлтэй болохыень дурадхагдаа.

- Буряадай гүрэнэй ехэ һургуулида һуража байхадамни, футболой һоригшо Сергей Александрович Кокорин обёоржо, һуралсалай гуламтын суглуулагдамал командада орохо аргатайш гэжэ нэгэтэ бэшэ хэлээ. Нэгэ һайхан үдэр зүбшөөлөө үгэжэ, ганса футболдо бэеэ зорюулдаг болооб. Тиихэдэ аяар 20 наһа гүйсэһэн байгааб, - гэжэ Эрдэм мэдүүлнэ.

БГУ-гай түлөө һайнаар наадажа, Буряадай суглуулагдамал командада уригдаа. 2017 ондо «Бурятия» клубай шэнээр байгуулагдахаһаа абаад, мүнөө болотор наадана. 2023 ондо Эрдэм Галданов «Бурятия» командатайгаа Сибириин болон Алас Дурна зүгэй чемпионадта шангай 2-дохи һуури эзэлээ. Мүн Сибириин Кубогта мүн лэ мүнгэн медаляар шагнагдаа. Харин мүнөө жэл эдэ амжалтануудаа дабтаа.

2024 оной халаанда Эрдэм Галданов «Бурятия» командын бүхы наадануудта хабаадажа, табан бүмбэгэ сохижо оруулаа.33 наһатай футболист ганса «Бурятия» командын түлөө наадана бэшэ, үшөө БГУ-гай командын ахамад һоригшоор томилогдонхой.