Паралимпиадада хабаадаагүйшье һаа...

Жэлэй түгэсхэлэй Ородой чемпи­онат Тульска мо­жын Алексин хотодо заншал­та ёһоороо эмхидхэгдэбэ. Юуб гэхэдэ, эндэ эрэмдэг бэетэйшүүлдэ һайн ор­шон байдал зохёогдонхой, һаадгүйгөөр урагша хойшо ябаха, байрлаха, мүрысэхэ арганууд олгогдонхой.

Түрүүшээр эдэ үдэрнүүдтэ иимэ мүрысөөн түсэблэгдөөгүй һэн гээд хэ­лэлтэй. Ород гүрэнэй һур харбаашад Паралимпиин наадануудта хабаадаха бай­гаа. Теэд хуурмаг шалгалтын үнгэргэгдэһэнэй удаа тэдэ­нэй нэгэнииньшье Паралим­пиадада урилгада хүртөөгүй. Тиимэһээ түхэреэн жэлэй хугасаада һорилго гараһан тамиршадай дунда өөһэдын тэмсээ эмхидхэхэ гэһэн шиидхэбэри абтаа.

Тус мүрысөөндэ 23 можо хизаарнуудай түлөөлэгшэд хабаадажа, һайн бэлэдхэлтэй байһанаа харуулаа. Буряад Уласай командын бүридэлдэ оруулагдаһан найман тамир­шан амжалтатайгаар хар­бажа, долоон медаль абажа шадаа.

Блочно һурша номоор харбаашадай дунда командна тоосоондо Буряадай түлөөлэгшэд нэгэ алтан ме­даляар шагнагдаа. Нэрэ со­лотой Баир Шигаев Алек­сандр Гомбожаповтай хамта түрүүлжэ гараа. Финальна уулзалгада Буряадай болон Московско можын команда­нууд анамана тэнсээ. Нэмэл­тэ годлёор харбаһанай удаа Буряадай тамиршад чемпи­он боложо тодороо.

Хубиин тоосоондо Алек­сандр Гомбожапов үнинэй амжалтануудые туйлаагүй ябаһанаа, шангай 3-дахи һуури эзэлээ. Александр гурбадахи медаляа команд­на микст тоосоондо абаа, Та­тьяна Андриевскаятай хамта шалгарһан байна. Мүн өөрөө Татьяна хубиин тоосоондо мүнгэн медальда хүртөө.

Классическа һурша но­моор харбаашадай дунда Сергей Хутаков хоёр мүнгэн, нэгэ хүрэл медаль абаа. Должина Лодоева хүрэл бо­лон мүнгэн амжалтануудые туйлаһан байна. Пётр Марза­ев аха дүүнэрээ, һоригшодоо мүнгэн медаляар баярлуу­лаа.