«Локосамбо» хүүгэдые суглуулна

«Локосамбо» мүнөө жэлдэ дүрбэн шатаһаа бүридэнэ. Тэндэ шалгарһан эгээл эрхимүүд һүүлшын финальна уулзалгануудта ошохо эрхэдэ хүртэхэ ёһотой. Тус мүрысөөндэ 2012-2014 онуудта түрэһэн хүбүүд, басагад хабаадана.

Мүнөө жэлэй халаанай 1-дэхи шатые Шэтэ хото угтан абаа. Үнгэрһэн долоон хоногой эсэстэ 2-дохи шатын тэмсээнүүд Улаан-Үдэдэ болоһон байна. Удаадахи шатанууд Владивосток болон Благовещенск хотонуудта намартаа болохоор хараалагданхай. Гол финал Хабаровск хотодо ноябрь һарада эмхидхэгдэхэ юм.

Үбэр Байгалай хизаарай ниислэлдэ 154 хүн мүрысөө. Тэндэ Буряадай эдир тамиршад 23 медаль абаа һэн. Тэдэнэй тоодо, долоон алтан медаль. Хяагта хотын Мунко Очиров, Елизавета Серебренникова, Улаан-Үдэ хотын Владимир Ревин, Глеб Агарков, Степан Перминов, Роман Мангутов, Захар Карпов гэгшэд Шэтэдэ түрүүлжэ гараа.

Улаан-Үдэдэ болоһон 2-дохи шатада 200 гаран хүбүүд, басагад суглараа. Мүрысөөн «Патриот» гэһэн тэмсээнүүдэй түбтэ дэлгэгдэһэн гурбан хибэс дээрэ болоһон байна.

Буряадай тамиршад өөрын талмай дээрэ 32 медаль абажа шадаа. Түрүү һууринуудые долоон хүн эзэлээ. Михаил Пивень, Глеб Агарков, Степан Перминов, Роман Мангутов, Сойжина Бадмацыренова (булта Улаан-Үдэ), Вадим Фёдоров (Гусиноозёрск), Таисия Рогова (Хяагта) гэгшэд шалгаржа, чемпионууд боложо тодороо.

Самбо барилдаанай федерациин зураг.