Эдиршүүлэй заншалта мүрысөөн

Һүүлэй хэдэн жэлдэ шэрээгэй теннисэй Буряадта аргагүйгөөр хүгжэжэ байһые булта обёорно ёһотой. Мүнөө үедэ федераци хүтэлбэрилжэ ябаһан Ганжур лама Раднаев (хүтэлбэрилэгшэ) Дагба лама Очиров (орлогшонь) хоёрой үүргэ тон ехэ гээд һанагдана. Буддын шажанай ехэ һургуулиин шангуудта хүртэхын түлөө мүрысөө эмхидхэжэ эхилһэндэнь баярламаар. Эдир залуу наадагшадай хүгжэлтын шэнэ харгыда гарахадань нүлөөлнэ. Тиимэһээ тэдэ дуратайгаар иишээ ерэжэ наадана. Мүнөө жэлдэ наһанай гурбан бүлэгтэ 130 гаран хүбүүд, басагад оролсоо.

Буддын шажанай ехэ һургуули тамирайнгаа бүхы мүрысөөнүүдые Ивалгын аймагтай, илангаяа эндэхи тамирай һургуулитай нягта харилсаа холбоотойгоор эмхидхэнэ. Эндэ тамирай 15 зүйлөөр үхибүүд, ехэшүүл, үндэр наһатайшуул бэлэдхэл гаража, һорилго хэжэ, бэеэ туршана. Эгээл эршэтэй зүйлнүүд гэхэдэ, муайтай, чирспорт, шэрээгэй теннис болоно.

Ивалгын тамирай һургуулиин дэргэдэ шэрээгэй теннисээр “Оргил” гэһэн басагадай команда байгуулагданхай. 2025-2026 оной хаһада тэдэ анха түрүүшынхиеэ Оросой чемпионадта хабаадаа. Дээдэ лигын “А” бүлэгтэ 16 команда сооһоо 9-дэхи һуури эзэлээ. Тус командын бүридэлдэ Ивалгын аймагай олон басагад оруулагданхай. Ерэхэ жэлэй хаһада дүнгөө һайжаруулха түсэбтэй.

Һаяхана Якутск хотодо 14 наһа хүрөөдүй тамиршадай дунда Алас Дурнын чемпионат болоһон байна. Ивалгын Арюна Буянтуева Буряадай суглуулагдамал командын бүридэлдэ оруулагдаад, командна тоосоондо мүнгэн медальда хүртөө. Хубиин тоосоондо Арюна Бимбаева шангай 3-дахи һуури эзэлээ. Нээлгын баяр ёһололой үедэ Ивалгын аймагай засаг дарга Николай Емонаков хоёр Арюнануудта тус тустань 7 мянган түхэриг шан барюулһан байна.

Ивалга тосхондо физкультурна элүүржүүлгын комплексын дэргэдэ болоһон мүрысөөндэ Арюна Буянтуева амжалтануудаа үргэлжэлүүлээ. 12 наһа хүрөөдүй басагадай дунда зургаан уулзалгада илалта туйлажа, чемпионой нэрэ зэргэдэ хүртөө. Ивалгын үшөө нэгэ түлөөлэгшэ Арьяана Пурбуевае шүүжэ гараа. Эндэ шангай 3-дахи һуури Улаан-Үдын Лиза Данилова эзэлээ. 12 наһа хүрөөдүй хүбүүдэй дунда Үбэр Байгалай хизаарай Могойтын Айдар Тудупов түрүүлээ. Ивалгын Амгалан Тубанов, Улаан-Үдын Георгий Инкин хоёр шангай һууринуудые эзэлээ. Эдэ нэрэнүүдые удангүй шэрээгэй теннисэй ододой дунда харахабди гээд найданабди.