Залуушуул Алас Дурнада шалгарна

Алас Дурна зүгэй федеральна тойрогто наһанай хоёр бүлэгтэ мүрысөөнүүд болоо. 21 наһа хүрөөдүй тамиршад Якутск хотодо суглараа. 16 наһа хүрөөдүй хүбүүд, басагад Үбэр Байгалай хизаарай ниислэл Шэтэ хотодо барилдаба. Буряадаймнай тамиршад һайн дүнгүүдые харуулжа, барилдаанда дуратайшуулые баярлуулба.

Хибэс дээрэ дүтын халаан

Якутск хотодо 21 наһа хүрөөдүй тамиршадай дунда мүрысөөндэ Буряадай барилдаашад 8 медаль абажа шадаа. Эдэмнай “үглөөдэр” аха халааниие һэлгэжэ, ехэшүүлэй дунда барилдаха хүнүүд болоно ха юм. Эгээл дүтын ерээдүй гэхэдэ, алдуу болохогүй.

113 эрэшүүлэй дунда Буряадай тамиршад гурбан алтан медальда хүртөө. 74 килограммай шэгнүүртэ Доржо Шарастепанов гурбан уулзалгада илалта туйлажа, түрүү һуурида гараа. 79 килограммда Тумэн Дондоков алтан медаль абахын түлөө дүрбэн барилдаашадые диилэжэ гараа. 125 килограммтай бүхэшүүл сооһоо Валерий Иванов шалгаржа, 1-дэхи һуури эзэлээ. Бато Кырмыгенов мүнгэн медаль абаа. Арсений Николаев, Ока Леджинов гэгшэд хүрэл медаляар шагнагдаа.

Эхэнэрнүүдэй дунда мүрысөөндэ оройдоол 10 хүн хибэс дээрэ гараа. Буряадай Нарана Бадмаева болон Елена Рожкова гэгшэдтэ алтан медальнууд зүүлгэгдээ.

Адли нэрэ обогтойнууд

Нарана Бадмаева – иимэ нэрэ обогтой дүрбэн басагад Буряадай суглуулагдамал командын бүридэлдэ оруулагданхай. Амаралтын үдэрнүүдтэ тэдэ булта амжалтануудые туйлаһан байна.

Нарана Бадмаевануудай эгээл эгэшэнь Якутск хотодо түрүүлээ. Нарана Мэргэновна 65 килограммай шэгнүүртэ алтан медаль абаһан байна.

Шэтэ хотодо басагадай мүрысөөндэ 150 гаран тамиршад хабаадаа. 54 килограммай шэгнүүртэ финалда хоёр Нарана Бадмаева хибэс дээрэ гараа. Түнхэнэй аймагай Нарана Сырен-Дондоповна Улаан-Үдэ хотын РСШОР-ой түлөөлэгшэ Нарана Баторовнае илажа, чемпион болоһон байна.

42 килограммай шэгнүүртэ Хэжэнгын аймагай Нарана Дамдиновна Бадмаева чемпионой нэрэ зэргэдэ хүртөө. Эндэ бүхы шангай һууринуудые Буряадай тамиршаднай эзэлээ гээд хэлэлтэй. Сарюна Ошорова 2-дохи һуурида гараа, Асель Сыренова, Улзы Шагдарова гэгшэд хүрэл медаляар шагнагдаа.

Шэтын хибэс дээрэ Буряадай басагад 20 медаль абажа шадаһан байна. Түрүү һуури эзэлһэн Инесса Гергенова Арина Будажапова хоёрые тэмдэглэмээр.

Хүбүүд хойнтоногүй

Үбэр Байгалай хизаарта Буряадаймнай хүбүүд баһа шалгараа. Тэдэ бүхы дээрээ 13 медальтай гэртээ бусаба. Табан тамиршад чемпионууд боложо тодороо. Эдэ хэд бэ гэбэл, Денис Цыпышев, Илья Гармаев, Дамдин Гомбоев, Сергей Цыбиков ба Радна Содбоев гэгшэд болоно.

Ерэхэ амаралтын үдэрнүүдтэ Благовещенск хотодо хибэс дээрэ 18 наһа хүрөөдүй тамиршад гаража, Алас Дурна зүгэй федеральна тойрогой чемпионадта хабаадаха.

Бүхы наһанай бүлэгүүдтэ тойрогтоо шалгарһан тамиршад Оросой чемпионадта хабаадаха эрхэдэ хүртэнэ гээд һануулая.

Суута Иван Ярыгинай мүрысөөн

Заншалта ёһоороо Орос гүрэнэй түрүү барилдаашад Красноярск хотодо январь һарын һүүл багаар сугларна. Аяар 37-дохиёо эмхидхэгдэжэ байһан уласхоорондын мүрысөөндэ 20 гаран гүрэнэй тамиршад айлшаар буухаар хараалагдана.

Шэгнүүр бүхэндэ түрүүшүүлэй тоодо ороһон Оросой тамиршад гүрэнэйнгөө суглуулагдамал командын бүридэлдэ оруулагдаха. Эндэ Европын чемпионадта ошохын түлөө шэлэн абалгын шата болоно ха юм.

Буряадай барилдаашаднай Красноярскын мүрысөөндэ хабаадахаар хараалагдана. Эхэнэрнүүдэй дунда 8 тамиршан хибэс дээрэ гараха юм. Дүй дүршэлтэй Эржема Жамсаранова, Ульяна Тукуренова, Валерия Дондупова гэгшэдтэй зэргэ залуу халаан бэеэ туршаха. Эдэ хэд бэ гэбэл, Саяна Будаева, Аяна Ухеева, Аяна Цыренжапова, Должон Цынгуева гэгшэд болоно. Буряадаймнай эгээл мэдээжэ барилдаашан Ирина Ологонова мүн лэ тус мүрысөөндэ хабаадаха тухайгаа һаяхана мэдүүлбэ.

Эрэшүүлэй дунда суглуулагдамал командын ахамад һоригшоор томилогдоһон мэдээжэ Александр Богомоевой мэдээсэһээр, Буряадай долоон барилдаашан Иван Ярыгинай мүрысөөндэ хабаадаха эрхэтэй юм. Үшөө табан тамиршадые оруулыт даа гэжэ мэдүүлгэ Орос гүрэнэй Спортивна барилдаанай федерацида эльгээгдээ.

Красноярскда шанга тэмсээнүүд январиин 29-һөө февралиин 1 болотор үнгэргэгдэхэ гээд мэдээсэнэбди.