Волейболой түб нээгдэбэ

Оросой Юрэнхылэгшэ Владимир Владимирович Путинай хабаадалгатайгаар волейболой “Эйс” гэһэн түб нээгдэһэн байна.

Самара хотодо “Россия- спортивная держава” гэһэн уласхоорондын хуралдаан 13-дахияа эмхид­хэгдээ. Владимир Путин тус хэмжээ ябуулгада хабаадал­сажа, Оросой табан можо хизаарта тамирай талмайнуу­дые видеоконференц-холбоогоор нээһэн байна.

Буряадай Толгойлогшо Алексей Цыденов Юрэнхы­лэгшэдэ абаһаар лэ баярые хүргэһэн байна.

- Манай Буряадта һүүлэй жэлнүүдтэ Владимир Влади­мировичай ашаар тамирай олон талмайнууд ашаглал­да тушаагдаа. “Байкал-аре­на” гэһэн мүльһэнэй ордон, “Патриот” гэһэн тулал­даануудай түб нээгдээ. “За­байкалец» стадион һэльбэн заһабарилагдаа. Харин мүнөө волейболой түб хүдэлжэ эхилбэ, - гэжэ Алексей Цыде­нов мэдүүлнэ.

“Эйс” гэһэн волейболой түб 104-дэхи кварталай бага хороодо оршоно. Буряад Уласай Арадай Хуралай хо­рооной түрүүлэгшэ Виталий Лыгденов энэ түб барилгада ехэхэн хубитаяа оруулаа.

- Гүрэнэй мүнгэн дэм­жэлгээр Буряад Уласай За­сагай газар, Улаан-Үдэ хотын захиргаан, Арадай Хурал хамтаржа, иимэ ехэ хэрэг бүтээбэ гээшэ, - гэжэ Вита­лий Лыгденов тэмдэглэнэ.

Өөрөө Виталий Лыгденов балшар бага наһанһаа волей­бол наададаг юм. Тэрэ үедэ улас дотор Захааминай ай­магай команда түрүүшүүлэй тоодо орожо шадаа. Тиигэжэ бүхэроссиин хэмжээндэ тон ехэ амжалта туйлаа бэлэй. Удаань һоригшоор Буряа­дай гүрэнэй ехэ һургуулида хүдэлөө. “Университет” ко­манда Оросой чемпионад­та наадажа эхилээ. Арадай Хуралда һунгагдабашье, во­лейболоо орхёогүй. Тэрэ уласай федераци ударидаа. Волейболой түбэй барилга хадаа наһанайнь хэрэг боло­но гэхэдэ, алдуу болохогүй.

Мүнөө үедэ волейбольно түб үглөөнһөө үдэшэ боло­тор хүдэлнэ. Үхибүүдшье, аха захатаншье классическа во­лейболой талмай дээрэ ерэ­жэ наададаг болонхой. Мүн элһэтэ волейбол Буряадта хүгжөөгдэхэнь. Юуб гэхэдэ, “Эйс” түбэй дэргэдэ хоёр тал­май элһээр хушаатай юм. 270 тонно элһэн асарагдаа. Япо­ной миниволейдэ дуратай­шуул эндэ сугларна.

- Буряадай волейболой команданууд Оросой чемпи­онадта хабаадаһан түүхэтэй. Мүнөө команда зохёон бай­гуулха һанаатайбди. Өөрын гэртэй болоо хадаа яһала бэлэн байха гээд һанагдана, - гэжэ Виталий Лыгденов түсэбөөрөө хубаалдана.