Оройдоол хоёр хүрэл

Барилдаанда дуратайшуулай зосоо дахинаа найдал түрүүлдэг тэмсээнүүд болоно ха юм. Теэд һүүлэй жэлнүүдтэ Буряадай барилдаашад хүндэтэ харагшадаа баярлуулхаяа шамданагүй. Энэшье удаа тэдэнэр оройдоол хоёр хүрэл медальда хүртөө.

Красноярск хотодо аяар 37-дохи жэлээ эрхим түрүү барилдаашад январиин һүүл багаар сугларһан байна. Мүнөө жэлдэ хэзээ хэзээнэйхиһээ олоор тамиршад тус мүрысөөндэ ерээ. Хибэс дээрэ 21 гүрэнэй 496 хүн гараһан байна.

Һүүлшын жэлнүүдэй түүхэ ираад үзэхэдэ, Буряадай барилдаашад Красноярскда 2023 ондо түрүү һуури эзэлһэн байна. Тиихэдэ Евгений Жербаев Ирина Ологонова хоёр чемпионууд болоо. 2024 ондо ганса Ирина Ологонова шангай 3-дахи һуури эзэлээ. Нёдондо гурбан басагаднай шангай һуурида гаража шадаа. Шалгарһан барилдаашад хэд бэ гэхэдэ, Валерия Дондупова, Ульяна Тукуренова (хоюулаа 2-дохи һуури) ба Эржэма Жамсаранова (3-дахи һуури) гэгшэд болоно.

Февралиин 1-дэ түгэсэһэн Иван Ярыгинай Кубогта хүртэхын түлөө мүрысөөндэ Буряадай тамиршад хоёр хүрэл медаль абаһан байна. 59 килограммай шэгнүүртэ Ульяна Тукуренова шалгараа. Һонирхолтойнь гэхэдэ, шангай һуури эзэлһэн бүхы тамиршад сооһоо Ульяна эгээл үсөөн дахин хибэс дээрэ гараа. Түрүүшынгээ уулзалгада Татарстанай Светлана Липатоватай тэмсээ. 1:1 гэһэн тоотойгоор уулзалгын түгэсхэдэнь, илалта Казань хотын түлөөлэгшэдэ үгтөө. Һая болотор Буряад Уласые түлөөлһэн Вероника Чумиковатай удаадахи тэмсээндэ уулзажа, Ульяна 10:6 гэһэн тоотойгоор шүүһэн байна. Буряадай тамиршанай хабаадалгатай шангай 3-дахи һуури эзэлхын түлөө уулзалга болоогүй. Санкт-Петербург хотын Арина Рыбкина хибэс дээрэ гараагүй. Иигэжэ оройдоол хоёр тэмсээндэ хабаадаһан Ульяна Тукуреновада хүрэл медаль зүүлгэгдээ.

“Номто” клубай гэшүүн Валерия Дондупова 65 килограммай шэгнүүртэ барилдажа, наһанайнгаа бүхы амжалтануудые туйлаа. Тус хэмжээндэ тэрэ 62 килограммда анха түрүүшынхиеэ барилдаба. Хэды тиигэбэшье шангай һуури эзэлжэ шадаа. Тэрэ Беларусь гүрэнэй хоёр түлөөлэгшые, Казахстанай тамиршаниие шүүһэн байна. Ганса Хойто Солонгосой түлөөлэгшэдэ диилдээ.

Хибэс дээрэ гараһан Буряадай тамиршад сооһоо үшөө гурбан хүн 5-дахи һууринуудта гараа. Ирина Ологонова, Эрдэм Борогшонов болон Тамир Ешинимаев гэгшэд болоно.

Эхэнэрнүүдэй дунда мүрысөөндэ КНДР-эй түлөөлэгшэд табан алтан медальда хүртэһэн байна. Орос гүрэнэй түлөөлэгшэдэй хоёрынь чемпионууд боложо тодороо. Монгол, Казахстан, Беларусь гүрэнүүдэй нэгэ-нэгэ тамирша басагад алтан медальнуудаар шагнагдаа.

Эрэшүүлэй дунда тэмсээнүүдтэ Оросой юһэн тамиршан түрүүшын һууринуудые эзэлээ. Тэдэнэй зургааниинь Дагестан Уласые түлөөлнэ. Хари гүрэнүүдэй тамиршад оройдоол нэгэ дахин чемпионой нэрэ зэргэдэ хүртөө. Мунх-Эрдэнэ Батхуяг 57 килограммда Монгол гүрэндөө алтан медаль асараа. Ярыгинай нэрэмжэтэ мүрысөөндэ Монголой тамиршад XXI зуун жэлдэ үшөө түрүүлээгүй байгаа.

Оросой суглуулагдамал командын ахамад һоригшо Хаджимурат Гацаловай хэлэһээр, Красноярскда түрүүлһэн тамиршад Европын чемпионадта хабаадаха. Эндэ шалгарһан эхэнэрнүүд уласхоорондын рейтинговэ мүрысөөндэ ошожо, бэеэ харуулха. Һүүлдэнь хэн Европын чемпионадта ошохоб гэжэ мэдэгдэхэ.