Һайхан заншал табигдаа

Январиин 30-да В.Р. Филипповэй нэрэмжэтэ Буряадай гүрэнэй хүдөө ажахын академиин дэргэдэ 23 наһа хүрөөдүй тамиршадай дунда бүхэ барилдаагаар мүрысөөн үнгэргэгдэбэ. Анха түрүүшынхиеэ болоһон хэмжээ ябуулгада 142 барилдаашад хабаадаһан байна.

Гараад байгаа 2026 ондо Буряадай гүрэнэй хүдөө ажахын академи байгуулагдаһаар 95 жэлэйнгээ ойн баярые тэмдэглэхэнь. Һуралсалай гуламтын дэргэдэ эмхидхэгдэхэ бүхы хэмжээ ябуулганууд үндэр баяр ёһололдо зорюулагдаха. Тэдэнэй тоодо бүхэ барилдаанай мүрысөөн оруулагдаа ааб даа.

- Манай академидэ тамир хүгжөөлгэдэ горитой ехэ анхарал хандуулагдана. Юуб гэхэдэ, хүмүүжүүлгын ажалай таһаршагүй шата гэжэ һанагшаб. Мүнөө үедэ дээдэ һургуулидамнай олон тоото тамиршад һурадаг. Тэдэнэй 50 гаран оюутаднай “Оросой спортын мастер” гэһэн нэрэ зэргэдэ хүртэнхэй, - гэжэ БГСХА-гай ректор, Буряад Уласай Арадай Хуралай һунгамал Бэликто Цыбиков мэдүүлнэ.

Академиин дэргэдэ барилдаагаар, самбогоор, боксоор болон тамирай бусад зүйлнүүдээр мүрысөөнүүд үнгэргэгдэдэг. Энэ тоодо буряад бүхэ барилдаагаар нээмэл чемпионат оробо гээшэ.

Тус хэмжээндэ ганса Улаан-Үдэ хотын дээдэ ба дунда мэргэжэлэй һуралсалай гуламтануудай түлөөлэгшэд хабаадаа бэшэ, мүн хүдөө һууринуудһаа тамиршад ерээ. Ушар гэхэдэ, абаһаар лэ шэнэ мүрысөөн ехэ удха шанартай боложо үгөө.

- Буряад бүхэ барилдаанда ехэ харюусалгатай жэл гараба. Бүгэдэ буряадуудай “Алтаргана” наадан Улаан-Үдэдэ июль һарын эхиндэ болохонь ха юм. Тиимэһээ бүхы эмхидхэһэн мүрысөөнүүднай ехэ удхатай болоно. Энэ тоодо залуушуулай барилдаанай найр наадан ороно. Хүдөө ажахын академиин тус хэмжээ бэе дээрээ даажа абаһандань, баярые хүргэнэбди, - гэжэ Буряад Уласай Тамирай яаманай Үндэһэн арадуудай наадануудай түбэй хүтэлбэрилэгшэ Баир Дашибальжиров хэлэнэ.

Буряад бүхэ барилдаанай федерациин хүтэлбэрилэгшэ Зорикто Цырендондопов нээлгын баяр ёһололдо амаршалгын һайхан үгэнүүдые хэлэхэ зуураа иигэжэ хабаадагшадта хандаа:

- “Алтаргана” наадандаа һайнаар бэлдэхэ ёһотойбди. Таанад булта иимэ мүрысөөнүүдтэ хабаадажа, бэеэ һайнаар һорибол, “Алтарганын” дүхэригтэ гараха аргатайт. Ондоо тамиршадһаа эрижэ ябахагүйн түлөө өөртөө буряад хубсаһа, гутал, малгай, бүһэ худалдажа абагты. Олоор ерэһэн айлшадта бүхы заншалайнгаа баялигуудые харуулха ёһотойбди.

Өөрөө Зорикто Цырендондопов хүдөө ажахын академи дүүргэһэн намтартай. Мүн бусадшье мэдээжэ барилдаашад эндэ һураһан байха. Уласай “Наадан-Сурхарбаанай” гурба дахин абарга болоһон Батор Гармаев түрэл һуралсалайнгаа гуламтада ерэжэ, гол шанда хүртэһэн тамиршанда хони бэлэг болгобо. Түгнын талаһаа уг гарбалтай академиин оюутан Аюр Нимаев абсолютна чемпионой нэрэ зэргэдэ хүртэжэ, гол шан абаба. Өөр өөрын шэгнүүрнүүдтэ Эрдэни Цыденжапов, Владимир Дондуков, Очир Галсанов, Зорикто Ухинов болон Аюр Нимаев гэгшэд түрүүлээ. Январь һара соо 24 наһа хүрөөдүй тамиршадай дунда дайшалхы самбо барилдаагаар Оросой чемпионадта мүнгэн медальда хүртэһэн Владимир Дондуков мүрысөөнэй эрхим барилдаашан гэжэ тодороо. Владимир хадаа технологическа факультедэй 1-дэхи курсын оюутан юм. Илья Жибалов эгээл гоёор бүргэдэй хатар гүйсэдхэһэнэй түлөө баһа шанда хүртөө.

Владимир Дондуков 

Владимир Дондуков баруун гарһаа

Борис Балдановай гэрэл зураг

Ректор Бэликто Цыбиковэй хэлэһээр, тус мүрысөөн жэл бүри үнгэргэгдэхөөр хараалагдана.