Түүхэтэ амжалта

Түүхэтэ амжалта

Буряадай тамиршан, “Номто” гэһэн тамирай клубай гэшүүн Баир БАТЛАЕВ Дубай хотодо үнгэргэгдэһэн боксоор дэлхэйн чемпионадта шангай 2-дохи һуури эзэлһэн байна. Иимэ үндэр хэмжээндэ нэгэшье Буряадай боксёр мүнгэн медальда хүртөөгүй байгаа бшуу. Тиигэжэ Баир түүхэдэ өөрынгөө нэрэ алтан үзэгүүдээр бэшүүлбэ.

Һүүлэй 10 гаран жэлдэ Буряадай боксёрнууд һайн дүнгүүдые харуулдаг болонхой. Жэл бүри уласхоорондын хэмжээнэй мүрысөөнүүдтэ, тэрэ тоодо дэлхэйн чемпионадуудта шалгарна. 2017 ондо Тамир Галанов Гамбург хотодо болоһон дэлхэйн чемпионадта хүрэл медаляар шагнагдаа һэн. 2023 ондо Бэшүүрэй аймагһаа уг гарбалтай Георгий Кушиташвили мүн лэ шангай 3-дахи һуури эзэлээ. Мүнөө жэлэй тэмсээнүүдтэ Георгий тус амжалтаяа дабтажа, дахинаа хүрэл медальда хүртэһэн байна.

Буряадай эхэнэрнүүд ялас гэмэ амжалтануудые эрэшүүлтэй адли туйлана. 2018 ондо Кристина Ткачёва 3-дахи һуурида гараһан байгаа. 2019 ондо дэлхэйн чемпионат Улаан-Үдэ хото угтан абаа бэлэй. Буряадайнгаа харагшадые Людмила Воронцова аргагүйгөөр баясуулаа, тэрэ мүнгэн медаль абажа шадаа. 2025 ондо Наталья Шадрина дэлхэйн чемпионадай хүрэл медаляар шагнагдаа. Харин мүнөө Буряадай тамирта дуратайшуулые баярлуулха ээлжээн Баир Батлаевта хүрэбэ гээшэ.

Хүйтэн үбэлэй эхин һарада халуун Дубай хотодо энэ амжалта туйлагдаба. Түнхэнэй аймагһаа уг гарбалтай Баир Батлаев 51 килограммай шэгнүүртэ ринг дээрэ гараа. Орос гүрэнэй гурба дахин абарга болоһон тамиршан бүхы уулзалгануудаа эрхимээр үнгэргөө гээд мэргэжэлтэд тэмдэглээ.

Баир Батлаевай хабаадаһан шэгнүүртэ 31 хүн шаалсаһан байна. Тиигэжэ финал хүрэхын түлөө дүрбэн уулзалгада оролсоо. Боливи гүрэнэй Масай Альварадо, Французска Полинезиин Найк Каммингс, Маврикиин Фабрис Валери болон Замбиин Патрик Чиньемба гэгшэдые Буряадай боксёр шадамар бэрхээр шүүжэ гараһан байна.

Һүүлшын, эгээл гол уулзалгада үндэр нэрэ солотой тамиршад дайралдаа. Узбекистан гүрэнэй Хасанбой Дусматов Олимпиин наадануудай хоёр дахин абарга юм. Мүн 2023 ондо урдахи дэлхэйн чемпионадта алтан медаль абажа шадаһан байгаа. Бүхы мэргэжэлтэдэй тэмдэглэһээр, энэ уулзалгада Баир Батлаев ана-мана тэмсээ, илалта туйлаха аргатай байгаа. Теэд шүүгшэдэй һанамжаар, мүнгэн медальда хүртэхэ баатай байшоо. Узбекистанай боксёрто нэрэ солонуудынь туһалаа гээд нэмэхэ хэрэгтэй.

Буряадай боксёрой финалай уулзалга тухай һанамжаараа мэдээжэ мэргэжэлтэн Александр Беленький Орос гүрэнэй Боксын федерациин сайт дээрэ хубаалдаһан байна.

- Хоюулаа һалгайнууд, адли тэгшэ шаалсана. Дэлхэйн чемпионадай финалда бэшэ, миин юрын мүрысөөндэ уулзаһандал адли хоюулаа ехэ бэлэнээр шаалсаа. Эндэ Баир Батлаев үлүү байгаа гээд һанагдана. Теэд шүүгшэдэй энээниие хараагүйнь харамтай. Али би юушье ойлгоногүй гүб? - гэжэ Александр Беленький тэмдэглээ.

Буряад Уласай Арадай Хуралай һунгамал, “Номто” клуб байгуулагша Валерий Доржиев, тамирай сайд Иван Козырев болон бусад Дубай ошожо, Баирай амжалтые өөрынгөө нюдөөр хараһан байна. Мүрысөөн тухай һанамжануудаараа тэдэ үшөө хубаалдаагүй.

Баир Батлаев энэ медаляараа өөрынгөө һоригшо Доржо Шаргакшановые ехэтэ баясуулаа ёһотой. Үсэгэлдэр Доржо Нимаевич түрэһэн үдэрөө тэмдэглээ. Эгээл ехэ бэлэгынь хадаа Баирай медаль болоно ёһотой.

“Бэшүүрэй буряад” гэжэ нэрлэгдэһэн Георгий Кушиташвили ээлжээтэ амжалтаяа туйлаба. 2023 ондо Ташкент хотодо болоһон дэлхэйн чемпионадта тэрэ хүрэл медальда хүртөө һэн. Мүнөө жэлдэ энэ ехэ амжалтаяа дабтажа, олон тоото тамирта дуратайшуулые баясуулба.

Хэдэн жэлэй хугасаада Грузи гүрэнэй түлөө шаалсадаг тамиршан 86 килограммай шэгнүүртэ шалгараа. Кыргызстанай болон Анголын тамиршадые диилэһэнэй удаа Орос гүрэниие түлөөлһэн Шарабутдин Атаевтай хахад финалда уулзажа шүүгдээ. Тиигэжэ тэрэ хоёрдохиёо удаа дараалан дэлхэйн чемпионадта 3-дахи һуури эзэлээ.

Дубай хотодо Орос гүрэнэй тамиршад ялас гэмэ амжалта туйлаа. Бүхы 13 боксёр гэртээ медальтай бусаба. Долоон алтан, табан мүнгэн, нэгэ хүрэл медальнуудые тамиршаднай абажа шадаа. Всеволод Шумков, Илья Попов, Исмаил Муцольгов, Джамбулат Бижамов, Шарабутдин Атаев, Муслим Гад жимагомедов, Давид Суров гэгшэд өөр өөрын шэгнүүртэ түрүүлжэ гараа.