Амжалтатай долоон хоног

Ородой эдиршүүлэй футбольно лигэдэ мүрысөөн хоёр наһанай бүлэгтэ болоно гээд һануулая. Августын 10-да  Петропавловск-Камчатский хотодо “Бурятия” команда 2007 ондо түрэһэн хүбүүдэй  дунда ээлжээтэ наадаяа үнгэргөө. “Вулкан” гэһэн командые буряадай футболистнууд 2:0 гэһэн тоотойгоор илажа гараа. Удаань, августын 13-да Якутск хотодо РССФШ командые 5:1 гэһэн тоотойгоор шүүгээ.

Энэ наһанай бүлэгтэ хабаададаг Буряадай команда 19 очко абаад, 6-дахи һуури эзэлнэ. Южно-Сахалинск, Хабаровск хотонуудай футболистнууд түрүүшын  һууринуудта гаранхай.

2006 оной хүбүүд баһа Петропавловск-Камчатский, Якутск хотонуудта айлшалаа. Камчатска хизаарта Буряадай наадагшад 4:1 гэһэн тоотойгоор амжалта туйлаа. Мүн Саха-Яхад Уласта 4:2 гэһэн тоотойгоор наадан түгэсөө, талмайн айлшад шүүжэ гараа.

Энэ наһанай бүлэгтэ “Бурятия” команда 22 очко абанхай. Мүнөө үедэ тэдэ 3-дахи һуури дээрэ ябана. Благовещенск болон Владивосток хотын команданууд эндэ түрүүлнэ.

Буряадай эдир наадагшадай мэдүүлһээр, Камчатска хизаарта ажаһуудаг буряад угсаатан нютагайнгаа үхибүүдые буузаар хүндэлөө.

2006 оной командын табан түлөөлэгшэд Владивосток хотодо үнгэргэгдэһэн “Дети Азии” гэжэ уласхоорондын спортын наадануудта Алас Дурна зүгэй федеральна тойрогой суглуулагдамал командын түлөө наадаһан байна. Тэндэ тэдэ 4-дэхи һуури эзэлээ.

Һайн дуратанай командануудай дунда Ородой чемпионат үргэлжэлһөөр. “Бурятия” команда һүүлшынгээ гурбан наадануудые Эрхүү болон Шэтэ хотонуудта үнгэргөө. Эрхүүдэ “Байкал” командые шүүһэнэй удаа тэдэ Шэтэ хото айлшалжа ерээ. «Чита-М» командын наадагшадые тэдэ 3:1 гэһэн тоотойгоор шүүжэ гараа.

Удаадахи наадануудаа “Бурятия” команда түрэл Улаан-Үдэдөө үнгэргэхэ. Августын 19-дэ “Динамо-Барнаул-М” командатай уулзаха. Августын 21-дэ Бийск хотын “Темп” командатай наадаха юм.