Буряад соёлоо Москвада дэлгэрүүлнэ

Москвада оюутан хаһаяа үнгэргэжэ, тэндээл үлөөд, зохёохы намтараа үргэлжэлүүлһэн Вика нютагаархи­дайнгаа урда анха түрүүшынхиеэ хубиин тоглолто үнгэргэбэ. Буряа­дай эстрадын мэдээжэ дуушад Эр­дэни Батсух, Чингис Раднаев, Эр­жена Санжиева, хатаршадай «Угол зрения» бүлгэм Викые дэмжэн, аял­га дуунуудаа, хатар наадаяа дэлгээбэ.

Эжы аба хоёрыньшье «Тоонто» бүлгэмэй бүридэлдэ арадай дуунуу­дые гүйсэдхэбэ. Евгений ба Бэлигма Орбодоевтоной бүлэдэ Вика багаһаа соёл урлалай оршон соо үндыһэн. Мүнөө үхибүүдтээшье зохёохы ша­дабарияа дамжуулна гээд, хубиинь тоглолто гэршэлбэ. 4-дэхи ангиин һурагша Марк хүбүүниинь гита­раар наадажа, харагшадые баярлуулба.

«Москвада буряад соёлоо дэлгэрүүлхэ уялгатайб гэжэ бэеэ мэ­дэрнэб», - гэхэдэнь, харагшад Викын һанамжа дэмжэжэ байһанаа альгаа ташан мэдүүлээ.

«Эхиндээ хоолойнь һалганаад абаа гээшэ аабза. Теэд тиигэнгүй яа­хаб? Нютагаархидайнгаа урда дуула­хань харюусалга ехэтэй. Дуулаһаар байтараа, хоолойнь шангараад, Тина Тёрнерой «Тhe Best» гэжэ дуу ехэ бардаастайгаар дуулаа», - гээд, нэрэ­еэ хэлэхэ дурагүй харагша тэмдэглэ­бэ. «Ямар һайханаар бэеэ шэмэглээ гээшэб! Гадархи түхэлэйнь һайхан гээшэнь!» – гэжэ зал соо харагшадай һайшаан хэлсэхэ дуулдаа.

Энэ үдэшые хүтэлһэн мэдээжэ зүжэгшэн Светлана Бунеевагай ша­дабариие олон зон онсолно. Ганса буряад бэшэ, мүн ородшье дуунуу­дые Вика гүйсэдхөө. Тиихэдээ олон­хинь – өөрынь зохёоһон дуунууд байгаа. Буряад Уласай 100 жэлэй, Агуу Пётр хаанда хори буряадуудай бараалхан ошоһоор 320 жэлэй ойн баярта зохёохы үдэшэеэ зорюулаа.