«Сагаан һарын угалза» гэһэн үзэсхэлэн Улаан-Үдэдэ дэлгэгдэхэ

Байгша оной февралиин 27-һоо Ц. С. Сампиловай нэрэмжэтэ Уран һайханай музейдэ мүнөө үеын соёл уралигай «Сагаан һарын угалза – Узоры Белого месяца» гэһэн үзэсхэлэн дэлгэгдэхэ.

- Сагаалганиие угтуулан, манай Буряадай уран гартайшуулай – Уран зураашадай эблэлэй гэшүүдэй үзэсхэлэн дэлгэдэг һайхан заншалтай болонхойбди. Эндэ буряад арадай соёл болон ёһо заншал, тиихэдэ мүнөө үеын соёл уралиг хараха арга олгогдоно, - гэжэ музейн хүдэлмэрилэгшэд тэмдэглэнэ.

Буряад арадай соёлой угай баялиг, байгаалиин үзэсхэлэн харуулһан бүтээлнүүд олоной һонорто дэлгэгдэхэ. Эндэ Сагаалганай, наранай гараха, байгаалиин һэргэхэ г.м. үйлэнүүдэй удха шанар тайлбарилһан ажалнуудые үзэсхэлэнэй айлшад хараха аргатай.