Владимир Кожевников Буряад Уласай Соёлой сайдай орлогшоор томилогдоо

Буряад Уласай Л. П. Сахьяновагай ба П. Т. Абашеевэй нэрэмжэтэ хатарай колледжын захиралаар хүдэлһэн Владимир Вениаминович Кожевников 2025 оной мартын 5-да Буряад Уласай Соёлой сайдай орлогшоор томилогдобо.

Владимир Кожевников 1964 оной декабриин 4-дэ Улаан-Үдэдэ түрэһэн юм. 1983 ондо Буряадай гүрэнэй хатарай колледж, 2006 ондо Зүүн Сибириин гүрэнэй соёлой ба урлалай академи дүүргэһэн байна. 1983-2022 онуудта, аяар 39 жэлэй туршада, тэрэ Буряадай гүрэнэй оперо болон баледэй академическэ театрта хүдэлөө. Театрта хүдэлжэ байха үедөө буряад баледэй хүгжэлтэдэ ехэ хубитаяа оруулжа, талаан бэлигтэй зүжэгшэн, багша байһанаа гэршэлээ. Владимир Кожевников театрай репертуарта ороһон П. И. Чайковскиин: «Лебединое озеро», Э. Григэй «Пер Гюнт», Л. Делибэй «Коппелия», Ж. Аданай «Корсар», Л. Минкусай «Баядерка» болон бэшэшье бүтээлнүүдэй байгуулгада хабаадаһан байна. 2022 оной октябрь һарада Владимир Кожевников Буряад Уласай Л. П. Сахьяновагай ба П. Т. Абашеевэй нэрэмжэтэ хатарай колледжын захиралаар томилогдоо. Тэрэнэй ударидаһан коллектив болбосоролой эмхиин ёһо заншалнуудые зандань үлээхэ, хүгжөөхэ бодолго амжалтатайгаар  шиидхэжэ, шабинараа мүнөө сагай эрилтээр һургана. Колледжын хүмүүжэмэлнүүд Россиин ба уласхоорондын хэмжээнэй урилдаануудта эдэбхитэй хабаадажа, нэгэтэ бэшэ илагшадай тоодо ороһон байха юм.

Кожевников Владимир Вениаминович Ородой Холбоото Уласай габьяата артист (2006), Буряад Уласай габьяата артист (2000), Буряад Уласай гүрэнэй шанда хүртэгшэ (2006). Мэдээжэ зүжэгшэн Буряад Уласай Соёлой яаманай (2011), Буряад Уласай Арадай Хуралай (2014) Хүндэлэлэй грамотануудаар, «Ажалай алдар габьяагай түлөө» гэжэ орденой медаляар шагнагдаһан (2019).