Буряад Уласай уран зохёолшодые «Алас Дурна» гэһэн мүрысөөндэ хабаадахыень урина

Конкурсдо Россиин Алас Дурна зүгэй үнгэрһэн, мүнөөнэй ба ерээдүйн сагта зорюулагдаһан уран зохёолнуудай авторнууд хабаадаха аргатай. Зохёолнууд ород хэлэн дээрэ бэшэгдэһэн байха ёһотой.

Буряадай уран зохёолшо, 2023 ондо үнгэргэгдэһэн конкурсын полуфиналист Болот Ширибазаровай хэлэһээр, нютаг можын түүхээр гү, али зохёолой ямар нэгэ нюураар манай ороной олон янзын соёл тухай үргэн уншагшадта хөөрэхэ арга боломжо үгтэнэ.

- Бидэ олон яһатанай гүрэндэ ажаһуунабди, хэдэн зуугаад жэлэй үнгэрөөшье һаа, булта ондообди, бэе бэеһээ илгаатайбди. Ород хүбүүндэ удха үзүүргүй юумэн буряад хүбүүндэ шухала. Үгы һаа, нүгөө тээшээ. Тиимэһээ минии бэшэһэн «Драгоценный» романай гол герой-метис. Росси бидэ бүгэдэнэй орон нютаг. Эдэ зуугаад жэлнүүд соо бидэниие холбоһон, нэгэдүүлһэн юумэн бии болоо. Туужа соогоо энээн тухай хөөрэхые оролдооб. Полуфиналда гарааб, энэ илалта бэшэ, тиигэбэшье иимэ үндэр хэмжээндэ минии зохёол анхарагдаа, би баяртайб, - гэжэ Болот Ширибазаров хөөрэбэ.

Конкурс заншалта ёһоор гурбан шэглэлтэй: «Ута зохёол (романууд, туужанууд), «Богони зохёол» (рассказуудай, новеллэнүүдэй суглуулбари ба бусад зохёолнууд) ба «Үхибүүдтэ зорюулагдаһан зохёолнууд». Авторнууд, хэблэлнүүд, олондо мэдээсэл тараадаг хэрэгсэлнүүд, зохёохы бүлгэмүүд, засагай органууд болон бэшэшье эмхинүүд хүдэлмэринүүдые конкурсдо эльгээхэ аргатай.

Мэдүүлгэнүүдые абажа дүүргэһэнэй удаа шүүгшэд зохёолнуудые сэгнэжэ эхилхэ. 2025 оной сентябрь һарада конкурсын шэглэлнүүдтэ хабаадагшадай список бүридхэгдэхэ. «Алас Дурна» гэжэ В. К. Арсеньевэй нэрэмжэтэ шанда хүртэхын түлөө конкурсын түгэсхэлэй шатада гарагшад ноябрь һарада элирүүлэгдэхэ, харин декабрь һарада илагшад тодорхо.

«Алас Дурна» гэжэ В. К. Арсеньевэй нэрэмжэтэ шанда хүртэхын түлөө гүрэнэй конкурс Оросой Холбоото Уласай Засагай газарай Түрүүлэгшын орлогшо - Алас Дурнын тойрогоор Россиин Юрэнхылэгшын бүрин эрхэтэ түлөөлэгшэ Юрий Трутневай үүсхэлээр тогтоогдоо. 2019 оной декабрь һарада үнгэргэгдэһэн «Алас Дурнын тойрогой нютаг можонуудай үдэрнүүд Москвада» гэжэ хүмүүжүүлгын ба патриотическа хэмжээ ябуулгануудай үедэ анха түрүүшынхиеэ лауреадууд нэрлэгдэһэн байна.

Конкурс Алас Дурнада ба Россиин олон яһата арадуудай соёлой  нэгэдэмэл оршон байгуулгада уран зохёолнуудаа зорюулһан Россиин ба гадаада гүрэнүүдэй авторнуудые дэмжэхэ зорилготой.