Буряад Уласта «Илалтын сууряан» гэһэн Литературна марафон эхилбэ

 Марафондо Буряад Уласай ажаһуугшад наһанай хизаарлалтагүгөөр хабаадаха аргатай. Хэмжээ ябуулгада оролсохо гэбэл, Агууехэ Эсэгын дайн тухай зохёол ород гү, али буряад хэлэн дээрэ уншажа, майн 9 болотор үмсын хуудаһанда, үгы гэбэл,  ВКонтакте, Одноклассники бүлгэмүүдтэ, ниигэмэй сүлжээндэ эмхи зургаануудай хуудаһанда #ЭхоПобеды03 тэмдэгтэйгээр табиха хэрэгтэй. Илагшад ба шангай һууринуудые эзэлэгшэд дипломоор, сэнтэй бэлэгүүдээр шагнагдаха.

 «Илалтын сууряан» гэһэн Литературна марафон Агууехэ Эсэгын дайнда илалта туйлаһаар 80 жэлэй ойдо ба Эсэгэ ороноо хамгаалагшын жэлдэ зорюулагдана.

- Марафон дайнай үедэ совет арадай гаргаһан баатаршалга тухай дурасхаал сахиха зорилготой. Тиин тэрэ үе тухай литературна зохёолнуудые үзэхэ, уншаха ёһотойбди. Дайнай хүндэ жэлнүүдтэ түрэлхидөөрөө хахасажа, дайнда мордоһон сэрэгшэдые уран бүтээлнүүд зоригжуулжа, илалта туйлаха бата найдал түрүүлдэг һэн.  Иимэ хэмжээ ябуулганууд эрхэтэдые, үхибүүдые Эхэ ороншоор хүмүүжүүлхэһээ гадна зохёохы бэлигынь хүгжөөнэ, уран үгэдэ һонирхол татана, буряад хэлэеэ зандань үлөөхэ хэрэгтэ нүлөөлнэ, - гэжэ Буряад Уласай Толгойлогшын ба Засагай газарай Захиргаанай хүтэлбэрилэгшын мэдээсэлэй политикаар, олониитэтэй холбоогоор ба ниитын түсэлнүүдээр орлогшо Ирина Доржиева тэмдэглээ.

Литературна марафон «Илалтын сууряан» (буряад хэлэн дээрэ уншагшадта) ба «Эхо Победы» (ород хэлэн дээрэ уншагшадта) гэһэн янзануудтай.
Марафоной дүнгөөр үнгэргэгдэхэ баяр ёһололой хэмжээ ябуулгада илагшад, шангай һуури эзэлэгшэд урмашуулагдаха, мүн тусхай табан шан барюулагдаха. Хабаадагшадые бэлдэһэн багшанар эмхидхэгшэдэй баярай бэшэгүүдээр шагнагдаха.