434
Буряад Уласай хатарай колледж Оросой Холбоото Уласай Соёлой яаманай шэные үүсхэһэн индустри байгуулха талаар мүрысөөндэ илаба. 53 нютаг можоһоо ороһон 98 захяагай 35-иинь тэдхэмжын мүнгэ абаха болоо. Буряад Уласай хатарай колледж 2-дохи һуури эзэлжэ, түсэл бэелүүлхэ 59,988 сая түхэригтэ хүртэбэ.
Колледжын бааза дээрэ шэные үүсхэһэн һургуулиин нээгдэхэдэ, Улаан-Үдэ хотодо сагай эрилтэдэ таарама болбосоролой түб бии болохо. Буряад арадай заншалта урлал тоо оньһоной арга зүйнүүдтэй холбогдохо. Абяа найруулгын, фото- ба видео- үйлэдбэриин, анимациин, 3D-графикын, дизайнай, мүн мүнөө сагай электронно хүгжэмэй студинүүд байгуулагдаха.
- Буряад Уласай хатарай колледжын бааза дээрэ нээгдэхэ шэные үүсхэһэн һургуули Улаан-Үдын 12-һоо 17 хүрэтэр наһатай һурагшадай суглардаг газар болохо. Һурагшад мүнөөнэй тоо оньһоной арга зүйнүүдтэй танилсахаһаа гадна шэнэ технологинуудые баледэй түсэлнүүдые байгуулхадаа хэрэглэхэ аргатай. Колледжын оюутадай ба студинуудта ябадаг хүүгэдэй хамтын ажалай дүнгөөр заншалта урлал шэнэ зэбсэгүүдтэй нэгэдэхэ. Тиин тус ажалай дүнгөөр урлалай шэнэ арга боломжонууд үхибүүдтэ нээгдэхэ, - гэжэ Буряад Уласай хатарай колледжын захирал Эльвира Доржиева тэмдэглэбэ.
Түсэл бэелүүлгын ашаар театрнуудтай, музейнүүдтэй, филармонитой, соёлой бэшэшье эмхи зургаануудтай нягта холбоо байгуулагдаха гэжэ хүлеэгдэнэ. Мүн һурагшадай ба оюутадай нэмэлтэ болбосоролдо түсэлэй бэелүүлгэ нүлөөлхэ.
- Мүнөөдэрэй байдалаар шэные үүсхэһэн индустриин һалбари һурагшадай ехэ һонирхол татана. Энэ хадаа нэмэлтэ болбосорол болоно. Һуралсал түлбэригүй, хоёр жэлэй туршада үргэлжэлхэ. Дүүргэгшэдтэ үнэмшэлгэ барюулагдаха, - гэжэ Буряад Уласай Соёлой сайд Соелма Дагаева хэлэбэ.
Буряад Уласай Толгойлогшо Алексей Цыденов, Засагай газар түсэл бэелүүлгэдэ гол үүргэ дүүргэнэ. Соёлой яаманай мэдээсэһээр, Буряад Уласай хореографическа колледжын дэргэдэ байгуулагдаха шэные үүсхэһэн һургуули 2026 ондо нээгдэхээр хараалагдана.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
