Буряад ороной эрхэтэн Монгол Уласай «Найрамдал» орденоор шагнагдаба

Мүнөөдэр, Бурхан багшын Ехэ дүйсэн үдэр (Монгол орондо улас түрын һайндэр гэжэ соносхогдонхой), Улаан-Үдэдэхи Монгол ороной Генеральна консульстводо манай хүндэтэ Галина Хандуевна Дашеева-Базаржаповада Монгол Уласай «Найрамдал» орден хүндэтэйгөөр барюулагдаба.

Хүндэтэ айлшадые, гүрэн түрын сайд түшэмэлнүүдые угтадаг ёһололой танхим соо Буряадай, Оросой соёлой габьяата хүдэлмэрилэгшэ, Буряадай арадай поэт, хэдэн шангуудай лауреат, ирагуу найрагша, уран зохёолшо, оршуулагша, сэдхүүлшэ, сурбалжалагша, “Байгал” сэдхүүлэй эрхилэгшэ Галина Хандуевна Дашеева-Базаржаповада үндэр шагналай барилгын баяр ёһололдо хабаадахаяа Орос Уласай габьяата, Буряадай арадай артист, уран зохёолшо, оршуулагша, Буряадай Толгойлогшын дэргэдэхи аха захашуулай Зүблэлэй гэшүүн, Монгол ороной “Алтан гадаһан” орденэй кавалер Доржо Норбо-Сампилович Сультимов, “Буряад үнэн” Хэблэлэй байшангай захирал-ахамад эрхилэгшэ Даша-Доржо Найманович Болотов гээд лэ эдэ мүрнүүдэй автор ошообди.

Тэндэ Монгол ороной Буряадтахи Юрэнхы консул Ц. Ганхуяг, консул Б. Батчулуун, вице-консул Ч. Батбилиг, вице-консул Б. Батням, мэргэжэлтэн Б.Болдсүрэн гэгшэд хүндэтэйгөөр угтажа:

- Мүнөөдэр, Бурхан багшын Ехэ дүйсэн үдэр, манай Монгол орондо улас түрын һайндэр гэжэ соносхогдонхой. Тиимэһээ манай консульствын ажалшад бүгэдөөрөө амаржа байна. Харин бидэ Монгол орондо маша хүндэтэй Галина Хандуевнае энэл Ехэ дүйсэн үдэртэ Монголой түрүү орденоор хүндэтэйгөөр шагнахаяа энэ һайндэрые һунгаһан байнабди, - гэжэ Юрэнхы консул Ц. Ганхуяг бидэниие халуунаар угтаа.

Юундэ, ямар хэрэгүүдэй, ямар ехэ амжалтануудай, туйлалтануудай түлөө Галина Дашеева-Базаржапова хари гүрэнүүдэй эрхэтэдые шагнадаг Монгол ороной дээдын шагналда хүртэбэб гэжэ Б. Болдсурэн Монгол ороной Юрэнхылэгшэ Ухнаагийн Хүрэлсэхын бэшэгые ородоор уншажа үгөө. Манай Галина Хандуевна Монгол ороной шэлдэг зохёолшодой уран зохёолнуудые буряад уншагшагта уран наринаар хүргөө, Халхын-Голой дайе, тэдэ байлдаануудай гайхамшагта баатаршалгануудые үнэншэмэ зүбөөр харуулаа, Эсэгэ ороноо хамгаалгын Агууехэ дайнда монгол туургата арадуудай аша габьяае тодорхойлоо юм.