437
Буряад театрайхидай Охотско далайда хүрэжэ ерэхэдэ, бүрхэг, хүйтэн уларил тогтоод байгаа. Энэ ушараар Буряад театрай залан хүтэлбэрилэгшэ, Чехов-түбэй зүжэгшэн Елена Денисова нёдондо болоһон ушар һануулаа: «Зүжэгшэд хүүгэдэй шүлэг гү, али шэдитэ үгэнүүдые хэлэжэ, фестивалиин бүхы үдэрнүүдтэ наратай уларил тогтоо һэн».
«Үүлэн, үүлэн саашаа,
Наран, наран наашаа», - гэжэ бүхы автобусоороо Буряадай түлөөлэгшэд уншаһан байна.
Буряад театрай уран һайханай хүтэлбэрилэгшэ Олег Юмовай «Дон Жуан» гэһэн зүжэг Алас Дурнын тойрогой театрай шүүмжэлэгшэдэй хоёр шанда хүртэһэн байна. Энэ зүжэгтэ Дон Жуан Сганарель хоёрой гол рольнуудые гүйсэдхэһэн Бато Шойнжонов болон Буряад Уласай габьяата зүжэгшэн Дария Шагдурова хоёр «Эрхим дуэт» гэһэн шагналда хүртөө. «Дон Жуан» спектакльда зүжэгшэдтэ һонирхолтой дүрэнүүдые бэлдэһэн Буряадай мэдээжэ дизайнер Надежда Абзаева «Костюмай эрхим уран зураашан» гэжэ нэрлэгдээ.
Олег Юмовай буряад хэлэн дээрэ табиһан зүжэгтэ Дон Жуанай түүхэ юрэ бусын аргаар харуулагдаа. Спектаклиин эхинһээнь хойшо Дон Жуан абьяастайгаар эхэнэрнүүдэй тархи эрьюулжэ, туйлалта бүхэниинь тэрэнэй хорхойень бүришье хүргэнэ. Шог ёгто диалогуудые шагнажа, хирэ-хирэ болоод лэ, харагшадай энеэлдэхэ соностожо байгаа. Тиигэбэшье зүжэгшэдэй ялас гэмээр дүрэнүүдээ харуулһаар байтарнь, золгүй хуби заяатай байһан хүнүүдэй ехэ гай гашуудал тобойн гаража ерээ.
Буряад театрай гастрольнууд байгша ондо Архангельскһаа Южно-Сахалинск хүрэтэр үргэлжэлөө. Алас Дурнын театрнуудай VI фес- тивальда Буряадай зүжэгшэдые хүлеэжэ байгаа гэхэдэ, алдуу болохогүй. Юундэб гэхэдэ, биледүүд эртүүр дууһаа һэн. Чехов-түбэй зонхилогшодой хэлэһээр, бусадшье театрнуудай зүжэгтэ залаар дүүрэн хүн суглараа, харин Буряад театрай «Dон Жуан» спектакльда өөһэдыньшье зүжэгшэдтэ һуури үлөөгүй. Амжалта гү?
Автор: Дарима АНАНДАЕВА бэлдэбэ
Фото: Буряад театрай гэрэл зурагууд
