Доржо Сультимов үндэр нэрэ зэргэдэ хүртэбэ

Оросой Холбоото Уласай га­бьяата зүжэгшэн, Буряадай арадай зүжэгшэн, «Үндэһэн хэлэнүүдые болон угсаата соёлой шэглэлтэй бусад зүйл шудалалгые дэмжэхэ талаар Улас түрын «Бэлиг» түб» гэһэн гүрэнэй бюджедэй эмхи зургаанай ахамад мэргэжэлтэн До­ржо Норбосампилович Сультимов ээлжээтэ амжалтаяа туйлажа, «Бу­ряад Уласай арадай уран зохёолшо» гэһэн хүндэтэ нэрэ зэргэдэ хүртэбэ.

Доржо Норбосампилович 2020 ондо Улас түрын «Бэлиг» түбэй бүридэлдэ Гүрэнэй оршуулгын албанай байгуулагдаһан сагһаа хойшо уран зохёол оршуулагшаар урагшатай ажаллажа, энэ богони­хон хугасаа соо буряад арадайнгаа, түрэл хэлэнэйнгээ аша туһада аргагүй ехэ хубитаяа оруулһан юм.

Ном боложо гараһан зарим оршуулгануудыень нэрлэбэл, мон­гол уран зохёолшодой - Д. Намдагай «Хүгшэн шонын уляан» туужа, С. Эрдэниин «Занабазар» гэһэн түүхэтэ роман, «Үдэрэй одо мүшэн», «Ангуу­шанай һамган», «Хүхэ хулгана жэл», «Сэмжүүдэй», «Басагадай зун» туу­жанууд, Б.Нямаагай «Арандалайхин» гэһэн түүхэтэ роман болоно. «Зана­базар» романиинь 2022 ондо буряад хэлэн дээрэ бэшэгдэһэн «Жэлэй эрхим ном» гэжэ тодороо юм гэжэ һануулая.

«Бэлиг» түбэй хүтэлбэри, ажал­шад эрхим хүндэтэ аха захатанай гансашье мүнөөнэй хэрэгүүдые бэшэ, харин уран зохёолшын үүргээр бэелүүлһэн ажалыень үндэрөөр сэгнэжэ, «Буряад Уласай арадай уран зохёолшон» гэһэн хүндэтэ нэрэ зэргэдэ дэбжүүлһэн байна.

Бэшэһэн зохёолнуудыень, хэблүүлһэн номуудыень тоолобол, «Амиды зула», «Эртын хабараар», «Алтан бэһэлиг» гэжэ зүжэгүүд, «Эхын захяа» туужа, олон тоото хөөрөөнүүд, хүүгэдтэ зорюулагдаһан хөөрөөнүүдэй «Гуталгүй гулабхаа» гэжэ согсолбори ном, туужануудай «Минии жаргал» суглуулбари, «Хүгшэн эжын зальбарал» гэжэ хөөрөөнүүдэй ном болон бусад.

«Доржо Норбосампиловичай ажалай намтар хадаа буряад арадтай, тэрэнэй түүхэтэй, соёлтой, хэлэн ба уран зохёолтой нягта холбоотой гэжэ онсолон тэмдэглэмээр. Юуб гэхэдэ, тэрэ олон жэлдэ Буряад театрта зүжэгшэнөөр алба хаагаа, арбаад жэлэй туршада тэрэниие амжалта түгэс хүтэлбэрилжэ ябаа, Буряадай радиодо ахамад эрхилэгшээр ажаллаа. Мүнөө Улас түрын «Бэлиг» түбтэ хүдэлмэрилнэ.

Тиин хаанашье ажаллахадаа, холуур харадаг, гүнзэгыгөөр бододог, арадайнгаа хуби заяанда нүлөөлхөөр зүйтэй шиидхэбэринүүдые абадаг гэжэ бултанда мэдээжэ.

«Бэлиг» түбэй ажалшад эрхим хүндэтэ аха захатанаа энэ үндэр шаг­налаарнь халуунаар амаршалаад, саашанхи ажалдань амжалтануудые хүсэнэ!