Шэди ехэтэй Шэбэртынхид

Удаань хоёрдохи дабхарта шэнэ түхэлэй модельнэ номой сан уншагшадаа угтан абаа.

Буряад Уласай Арадай Хуралай Түрүүлэгшэ Владимир Павлов нютагаархидаа дэмбэрэлтэ үдэрөөр амаршалхадаа, ая-гангаар анхилhан ороноо холо ойгуур магтан дуулаhан Бу­ряадай агууехэ уран найрулагша Дондок Улзытуевай нэрэмжэтэ соёлой байшанай hүүлэй үеын эрилтэнүүдтэ гүйсэд таарама жэшээтэ но­мой сантай болоhон ушараар баяр хүргэбэ.

Владимир Павлов

– Тус гуламтада ажаhуугшад, холо ойрын айлшад сэдьхэлээ тэнжээн хооллуул­ха аргатай, аймагайнгаа ниитын хэмжээ ябуулгануудые үнгэргэхэ зохид оршонтой болобот, - гээд, Владимир Анатольевич тэмдэглээ.

Федеральна тусхай программын ашаар, номой сан бүридхэн байгуулгада 8 сая түхэригэй мүнгэн hомологдоо. Барилга-заhабарилгын, шэрдэлгэ-шэмэглэлгын ажалнууд бүхэли зундаа ябуулагдаа, удаань шэнэ эд бараан, онсо оньhон техно­логинуудаар хүдэлдэг мүнөө үеын техникэ абтажа тодхог­доо, 1268 ном абтаа. Номой санда хэрэгтэй хамаг хангал­танууд хабсаргагдаа гэжэ он­солмоор.

Номой сан шэнэлхэ дэмбэрэлтэ энэ хэрэг «Гэр бүлэ» гээд үндэhэн түсэлэй бүридэлдэ ородог «Гэр бүлын гол баялигууд болон со­ёлой үндэhэн hуури байгуу­ламжа» гэhэн түсэлэй ёhоор бэелүүлэгдээ.

Улас дотор иимэ шэнэ түхэлэй 19 номой сан зо­хёон байгуулагдаа, харин Бэшүүрэй аймагта түрүү түхэлэй түрүүшын жэшээ харуулагдаа. Шэбэртынхид шэлэн абтажа, шэб шэнэхэн номой сантай болоhондоо урматай, зариманиинь үнэншэжэ ядаhан хэбэртэй hаргама гоё танхимуудаар hэмээхэнээр маряан ябанад hэн.

Шэбэртэhээ гарбалтай уг­саата үндэhэн арадаймнай алтан гургалдай хүбүүдэй намтар тухай мэдээнүүд хаб­саргагдаа. Мэдээжэ уран үгэ найруулагшадай гэрэлтэ зам тухай мэдээнүүд номой сан­да элбэгээр табигдаа: Цы­денжап Дондубон, Дондок Улзытуев, Цырен-Дондок Ха­маев, Валерий Дабаев, Цы­рен-Дондок Шагжиев, Вла­димир Жалсанов, Бальжи-Нима Намдаков болон бусад - булта Шэбэртын хүбүүд гээд тэмдэглэхэ шухала. Хара багаhаа урдаа хараха уран зохёолшодой ульгам оршон­до үндыhэн Арадай Хуралай Түрүүлэгшэ Владимир Пав­ловай сэбэр буряад хэлээрээ дуугардагынь гайхалгүй.

Бурьялма буряад хэлэнэй арюун тунгалаг булаг болохо Шэбэртэhээ гарбалтай алиш үндэhэ яhанай хүбүүд, баса­гад хаанаш ябахадаа, түрэл хэлэеэ үргэжэ ябадаг буян хэшэгтэй гээд адаглахаар.

Ольга НАМДАКОВА