Түүхэтэ үзэсхэлэн

Бүгэдэ буряадуудай «Алтаргана» наадан 1994 ондо эхиеэ абаа һэн гээд һануулая. Тэрэ гэһээр аяар 16 наадан үнгэргэгдөө. Һонирхолтой хэмжээ ябуулганууд хэзээ, хаана болооб, ямар янзатай байгааб гэжэ олон хүн мэдэнэгүй ха юм. Тиимэһээ Агын музейн мэргэжэлтэд түүхэтэ стенднүүдые бэлдэбэ.

10 гаран томохон стенд УлаанҮдэ асарагдажа, ФСК-гай хажууда дэлгэгдээ. Урагша хойшоо ябаһан айлшад, «Алтаргана» нааданда хабаадагшад энэ үзэсхэлэн һонирхожо хараһаниинь гайхалгүй. Стенднүүд дээрэхи мэдээсэлнүүд үргэнөөр «Алтарганын» түүхэ харуулаа. Мүн һонирхолтой фото-зурагуудаар шэмэглэгдэнхэй.

Гомбожап Цыбиковэй нэрэмжэтэ Агын музейн мэргэжэлтэд, эрдэмэй талаар хүдэлмэрилэгшэд «Алтарганада» олоороо хабаадаһан байна. Тэдэ ехэ ажал ябуулаа. Бүхы хэмжээ ябуулгануудта фото-зурагуудые хээ, видео дээрэ буулгаа. Иигэжэ ээлжээтэ түүхэтэ мэдээсэлнүүдые суглуулаа. Һонирхол татама хүнүүдтэй уулзажа, хөөрэлдэһэн байна. Удангүй эдэ ажалнуудынь музейн дэргэдэ дурадхагдахал байха гээд һанагдана.

Нааданай үедэ Буряадай үндэһэтэнэй музей, Агын үндэһэтэнэй музей уулзажа, саашадаа нягта харилсаатайгаар хүдэлхэ тухай хэлсээ баталһан байна. Захиралнууд Татьяна Анатольевна Бороноева Марина Батоевна Болотова хоёр энэ данса дээрэ гараа табяа.

Агын музейн болон Борис Балдановай гэрэл зурагууд.