1323
Майн 9-дэ үдэрэй 17 сагта «Ариг Ус» болон «Бурятия» телеканалнуудаар, мүн minkultrb.ru сайтаар Илалтын 75 жэлэй ойдо зорюулагдаһан һайндэрэй тоглолто шууд дамжуулагдаха.
Тиигэжэ гэрһээ гарангүй, дүтынгөө зоной дүхэригтэ Буряадайнгаа соёл уралигай түрүү түлөөлэгшэдэй абьяас бэлигые агаарай долгёор сэгнэн хужарлаха арга боломжо олдохонь бшуу. Уласаймнай соёлой бүхы эмхи зургаануудай ажалшад Ород драмын театрай тайзан дээрэ гаража, Эсэгэ ороноо хамгаалгын дайн тухай мэдээжэ дуунуудые гүйсэдхэхэ.
- Дайнда хабаадаһан, ара талада хүдэлһэн хүндэтэ ветерануудаа иимэ аргааршье һаань амаршалхаяа һананабди. Тиимэһээ Буряад оронойнгоо бүхы арад зониие онлайнтоглолтыемнай харахыень уринабди, - гэжэ уласай соёлой сайд Соёлма Дагаева хэлэнэ.
Ород драмын театрһаа гадна, Үндэһэнэй музейһээ сэхэ дамжуулга гараха. Тэндэнь «Уран зураашад дайн тухай» гэһэн үзэсхэлэн нээлгын баяр ёһолол үнгэрхэ юм ха. Эдэ бүгэдые хаража байһан зон өөһэдынгөө һанамжа бодолнуудые Интернедтэ шууд элирхэйлжэ байха аргатай. Гадна үреэлэй үгэнүүдые, амаршалгануудыешье эльгээжэ болоно. Тэдэнэй заримыень сэхэ дамжуулга хүтэлэгшэд уншажа соносхохо.
