986
Бүгэдэ Буряадай «Алтаргана» наадан ерэхэ зун Үбэр Байгалай хизаарта боложо үнгэрхэ аад, нэгэ жэлээр хойшолуулагдаба. Үбэр Байгалай хизаарай амбан захирагша Александр Осипов энэ наада бүхэдэлхэйн зиндаатай болгохо түсэбтэй байһан тухайгаа ГТРК «Чита» гэһэн теле-субагай агаарай долгиндо сэхэ дамжуулгада хабаадаха үедөө дуулгаба.
Бүгэдэ Буряадай «Алтаргана-2018» нааданай һүүлшын үдэр Эрхүү можын амбан захирагша Александр Левченко «Алтарганын» һүлдэ туг Үбэр Байгалай хизаарай түлөөлэгшэдтэ дамжуулһан юм.
- Манай хизаарта «Алтаргана» эгээл үндэр хэмжээндэ үнгэргэгдэхэ, юундэб гэхэдэ, бидэнэй бэлэдхэл хэхэ нэмэлтэ саг үгтэбэ гээшэ. COVID-19 үбшэнһөө боложо, нэгэ жэлээр хойшолуулха баатай болобошье, энэ наадаяа бидэ бүхэдэлхэйн хэмжээндэ эмхидхэхэбди, - гэжэ Үбэр Байгалай хизаарай амбан захирагша Александр Осипов мэдүүлбэ.
Энэ нааданай эмхидхэлэй хорооной хүтэлбэрилэгшэдэй нэгэн, Агын Буряадай тойрогой толгойлогшо Буянто Батомункуев: «Коронавирус тахалһаа боложо, «Алтарганын» хойшолуулагдаһан тухай Эрхүү можо, Буряад Улас, Монгол, Хитад гүрэнһөө хабаадаха түлөөлэгшэдтэ дуулгагдаа», - гэжэ мэдээсэнэ.
Анна Огороднигой гэрэл зураг
Автор: Булат БАДМАЕВ
