1473
Буряадай мэдээжэ эрдэмтэн, хэлэ бэшэгэй эрдэмэй дид-доктор Виктор Гунгаров “Монгол судлалда – онсо нэмэри” (2020, №1) Монгол ороной эрхэтэн, наһанайнгаа нүхэр-Нүүдэлэй соёлой академиин номшо Журнайн Нүрзэдэй нэрые мүнхэлэгшэ Гэндэнгийн Долгорсүрэн “Сэсэн хатан Соркуктай бэкуни: “Алтан дээд үнэний аялгуу” (2019 г. № 4) гэһэн шэнжэлхы статьянуудай түлөө түрүүшын хоёр һуури эзэлбэ.
Хизаар нютагаа шэнжэлэгшэ, үндэһэн изагуураа бэдэрэгшэ Иван Батуев “Соркуктай хатан – Монгол түрын шэмэг” (2019, №6) багша, хизаар нютагаа шэнжэлэгшэ Дондог Дашеевич Лыгденовэй суглуулһан домогуудые бүридхэһэн басаганиинь, Буряадай телевидениин мэдээжэ эрхилэгшэ Баярма Раднаева “Түнхэн дайдын хад-бурхадай дурдалганууд” (2019, № 2, №3) хоёрдохи хоёр һуурида гараа.
Буряадай мэдээжэ сэтгүүлшэ, Ород Уласай соёлой габьяата хүдэлмэрилэгшэ, хэлэ бэшэгэй эрдэмэй дид-доктор Туяна Самбялова “Гүн ехэ далайн гурбан дуһал” гэһэн шэнжэлгын (2019, № 5), Ород Уласай габьяата багша Бадма Базарова нютагайнгаа далаша мэргэн Шиираб үбгэн тухай (2019, №5), Ород Уласай Уран зохеолшодой холбооной гэшүүн, сэтгүүлшэ Анна Виноградова бэлигүүн үзэгдэлнүүд тухай “Шэнэ сагай домогшон” (2020, №1), Буряадай бэлигтэй сэтгүүлшэн, Буряад Уласай соёлой габьяата хүдэлмэрилэгшэ Александр Махачкеев “Дэгдээхэй мэргэн” (2019, №5), сониной штатнабэшэ бэшээшэд, ажалай ветеранууд Цырен-Доржи Токтохоев «Дээдэ-Ториин домогууд» (2019, №2), Мэргэн Шагжа (2019, №3), Цыдендоржи Жамсаранов «Агын домогууд» (2019, №3), Лубсан Цыренов «Хадата нютагай һургаалтай домогууд» (2019, №3), Лопсон Шенхоров “Агы нүхэнэй абарга баабгай” (2019, №4), Хандажаб Цыренов «Гэгээн мэдэлшэд» (2019, №6), Валерий Цыбиков «Дулаан хаанай мүргэл” (2019, №5), Цыренжаб Чойропов “Баргажанай домогууд» (2019, №5) гэһэн хужарлама һонин толилолгонуудайнгаа түлөө хүндэтэ гурбадахи һуури эзэлбэ.
Бэшээшэдэймнай тоо 15-да хүрөө. Арбан табанай мандал тэргэд һарадал үлзытэй, алтан дэлхэйе абаралай элшэ гэрэлээр жэгнэжэ, далан долоон домогыемнай дам арьбажуулжа байһан үзэгдэл мэтэ бэшэ гү?.
Урилдаанда хабаадагшадаа үнэн зүрхэнһөө амаршалнабди, уута абдараа дам саашань уудалжа, шэнэ үльгэр домогуудаар улад зоноо баясуулжа байял гэжэ уряалнабди.
Галина Базаржапова-Дашеева, уран зохёолой болон ниитэ улас түрын “Байгал” сэтгүүлэй эрхилэгшэ.
