Үзэсхэлэнтэй болгодог “Үһэшэ дархан”

 Сагдаа болохо хүсэлтэй аад...

Мэргэжэлээрээ яһала дүршэһэн, мэдээжэ боложо ябаһан Бата Раднаев 5 жэлэй туршада үһэ тайрагшаар хүдэлнэ. Урид иимэ ажалда орожо хүдэлхэш гэжэ хүнэй хэлээ һаань, тэрэ одоол этигэхэгүй һэн. Юуб гэхэдэ, Бата багаһаа хойшо сагдаа болохо тон ехэ хүсэлтэй бэлэй. Бүри һургуулиин байхаһаа тамирай талаар ехэ һорилго хэдэг байгаа. Дунда һургуулияа дүүргэхэдээ, БГУ- гай бэе тамирай факультедтэ оюутан боложо ороһон юм. Тэндэ һураха үедөө бэрхэ багша Софья Гомбоевна Халудоровагай ударидалга доро һорилго гаража, һур харбалгаар Ород Уласай спортын мастерай нэрэ зэргэдэ хүртэһэн. Дээдэ һургуулияа түгэсхэхэдөө, багынгаа һанал хүсэлдүүлхэ гэжэ оролдоо. Сагдаада алба хаажа эхилхын урда сэрэгэй албанда ябажа ерэхэ ёһотой гэжэ булта мэдэнэбди. Тиин Бата албанда ошохо һанаатай хэдэн удаа военкомадай богоһо алхажа, нилээд ябуулга хээ. Теэд хотын үбшэнтэй байжа, сэрэгэй албанда ошожо шадангүй, үнинэй хүсэжэ ябаһан һаналаа бэелүүлхэ хубигүй байшоо бшуу.

“Нэгэтэ нүхэр хүбүүмни намайе үһэеэ абхуулхыемни дуудаһан юм. Тэрэ тиихэдэ үһэ тайрагшын мэргэжэлдэ һуража байгаа. Үһыемни абаха зуураа намайе һургуули гарахыемни дурадхаа. Тиигээд лэ би эндэ үлөөд, мүнөө болотор хүдэлнэб”, - гэжэ ажалайнгаа намтар яагаад эхилһэн тухайгаа Бата Раднаев хөөрэнэ.

Тэрэ гэһээр залуу мэргэжэлтэн үдэрһөө үдэртэ дүршэжэ, мүнөө яһала мэдээжэ болонхой. Ажалайнь сагай хубаари хэдэн үдэр урид бэшээтэй байдаг. Эндээ бэрхэ мэргэжэлтэдһээ, суг хүдэлдэг нүхэдһөө дүй дүршэлыень халан абахаһаа гадуур Бата гүрэнэйнгөө ниислэл хото ошожо, мэдээжэ барбернуудай һургуули нэгэтэ бэшэ гараһан байха юм. Барбер гээд эрэшүүлэй үһэ зүһэ, һахал һамбай гоёор, онсоор тайрадаг хүниие хэлэдэг гээшэ.

Бата хадаа дэлхэй дүүрэн мэдээжэ тамиршан, дүримгүй наншалдаанай манлай бариһан Конор Магрегорэй өөрынь барберай һуралсалда оролсожо, дүршэлыень халан абаһан байна.

Онсоор үһэеэ заһуулха дуратайшуул олошорно

“Ехэнхидээ һургуулиин аха ангинуудай һурагшад үһэеэ тайруулхаһаа гадна “зураг зуруулха” дуратай байдаг. Намда зураг харуулхадань гү, али миин хөөрэжэ үгэхэдэнь, үһыень угалзатуулан, зурагтуулан

 Раднаев хөөрэнэ. - Хүнһөөл һаа ондоохоноор үһэеэ заһуулаад ябаха дуратай зон олон боложол байна. Анхандаа хуу булта нэгэ адляар үһэеэ тайруулаад ябагша бэлэйбди. Харин мүнөө саг хубилаа. Энэ талаар Урда Солонгосой эрэшүүл тон урдуур гэжэ һанагшаб. Тэндэхи эрэшүүл гэрһээ гарахын урда тээ гэрэлэй урда хэдэн сагай туршада зогсожо, бэеэ гоёодог, энээндэ эхэнэрнүүдһээ үлүү ехээр анхарал хандуулдаг гэжэ хэлэхээр”. абадагби, - гэжэ барбер Бата

Сахим хэрэгсэлэй хүгжэһэн сагта ажабайдалнайшье хубилна, абари замнайшье ондоо болоно. Хэдэн жэлэй саана хүбүүнэй үһэеэ шэрдэхэ, нюур шарайдаа элдэб жэмэс, тоһо түрхихэ гээшэ тон буруу ааша гээд сэгнэгдэдэг байгаа бшуу. Гоёмсуу хүбүүд шоо үзүүлхэ, үйлсын хабшууда сасуутандаа ээрүүлжэ, альган тараг һайса эдихэ байгаал. Харин мүнөө иимэ ябадал буруушааһан зоной үшөө биишье һаань, байдал ондоо боложол байна ха юм.

“Манай хотодо барбершоп яһала хүгжэнэ. Буряадтаа мэдээжэ эрэшүүл, ноёд һайд, дуушад, олзын хэрэг эрхилэгшэд яһала олоор ябадаг болонхой. Бидэ хүнэй үһэ тайрахын хажуугаар бууралтаһан һахалыень заһадаг, шэрдэдэг гээшэбди”, - гэжэ Бата хэлэнэ.

«Мэргэжэлтэ урилдаанда хабаададаг гүш?» - гэжэ асуухада, тэрэ иигэжэ харюусаа: «Үгы. Тиимэ урилдаанууд ехэнхи ушарта гүрэнэй баруун хотонуудта үнгэргэгдэдэг. Манайшье эндэ өөһэдын урилдаан болоол юм ааб даа, харин би оролсожо үзөөгүйб. Москва, Санкт-Петербург болон бусад томо хотонуудта уласхоорондын хэмжээнэй урилдаануудта тэрэ «Звезда в шоке» гэдэг Сергей Зверев мэтэ зон хабаадалсадаг. Юрын нам шэнги хүнэй ошоо һаа, тоохошьегүй гэжэ һананаб. Тэндэ хабаадахын тула тэдээн мэтэ болохо хэрэгтэй. Тиимэ газарта хүдэлхэ талаанай тудабал, хамаагүй, Зверев шэнги болошохо һэм», - гээд, энеэжэ байжа, Бата хөөрэнэ.

Мүнөө Бата наһанайнгаа нүхэртэеэ хоёр һайхан эхир дангина басагадые үндылгэжэ байна. Теэд басагадайнгаа үдэшын найр нааданда ошоходонь, үһэ зүһыень заһадаггүй.

«Басагадай үһэ заһаха һургуули гараһамби. Теэд эхэнэрнүүдтэй хүдэлхэдэ, намда хүндэшэг байдаг. Тиимэһээ би гансал эрэшүүлэй үһэ заһадаг хүм», - гэжэ Бата Раднаев хэлээ.

Хэдэн жэлэй үнгэрхэдэ, мэдээжэ барбернуудай тоодо ороод, мэргэжэл ехэтэй уран гартанай зэргэдэ ябахыень хүсэе!