Буряад балет олоной анхаралда

Байгша оной намар “Культура” канал дээрэ гараха “Ехэ балет” мүрысөөнэй  дамжуулгын видео буулгабарида манай артистнар хабаадаха.

Энэ жэлэй мүрысөөндэ хабаадагшадай, эмхидхэгшэдэй тоодо дэлхэйдэ мэдээжэ хатаршад Светлана Захарова, Ильдар Абдразаков болон бусад ороно.

Мүрысөөндэ хабаадагшад “Эрхим дуэт”, “Эрхим балерина”, “Эрхим хатаршан” номинацинуудаар бэлиг шадабарияа туршаха. Буряад ороной түлөөлэгшэдһөө гадна Саратов, Воронежь, Москва, Екатеринбург хотонуудай, Коми, Башкири уласуудай мэдээжэ театрнуудай түрүү артистнар хабаадаха.

Балетнэ труппын уран һайханай хүтэлбэрилэгшэ Баярто Дамбаевай хэлэһээр:

Үнгэрһэн жэлдэ манай театрта удха шанартай үйлэ хэрэгүүд болоо. Нэн түрүүн театрай байгуулагдаһаар наян жэлэй ойн баярта зорюулагдаһан хэмжээнүүд, “Талисман” гэһэн балет “Алтан баг” премиин гурбан номинацида эрхимлэжэ, олоной анхарал татаһан габьяатай. Манай театр тухай дуулаһан хадаа, «Большой балет» гэһэн конкурс эмхидхэгшэд  манай хатаршадые уриба.

 Репетитор-уран найруулагша  Татьяна Муруева:

Манай хоёр залуу артистнар яһала һайн бэлэдхэлтэй. Харин мүрысөөнэй бэшэ хадаадагшадай бэрхэ шадабариие хоёр нюдөөрөө хаража, сэгнэхэ болонобди. Эрдэм Харука хоёр “Красавица Ангара» балет гүйсэдхэжэ, Буряад Уласай соёл һалбариин хүгжэлтые олондо харуулха гол үүргэтэй.

Жюриин бүридэлдэ дэлхэйдэ мэдээжэ артистнар ороно. Тэдэнэй үндэр сэгнэлтэдэ хүрэхэ гээшэ, тон ехэ амжалта болохо.

Эрдэм Дагбаев Харука Ямада хоёр һанамжаараа хубаалдахадаа, ехээр һанаа зобоногүйбди, ехэ бэлэдхэл хэжэ, өөһэдынгөө бэлиг шадабари харуулжа туршая, - гээд тобшолно. Тиибэшье, Буряад ороноо иимэ ехэ хэмжээнэй мүрысөөндэ түлөөлжэ ошохо хэрэг ехэ харюусалгатай байна. Залуу байбашье, урагшаа дабшаха хүсэлтэйбди.