Буряад драмын театр ажалаа эхилбэ

Манай түсэбүүд

Нюураа хааха маскатай артистнар театрай байшан руу орохо эрхэтэй. Хүн бүхэнэй бэеын халуун шалгагдажа, репитициин үедэ бэе бэеынгээ хоорондо зай сахигдаха. Үндэр наһатай артистнар гэртээ амарһан зандаа.

“Ажалшан бүхэн тайзан дээрэ гарахаяа үнинэй һананхай байба. Бэлэдхэл эхилээ. Энэ жэлэй дүүрэтэр 5 зүжэг олон харагшадта дурадхагдаха түсэбтэй. Эсэгэ ороноо хамгаалгын Агууехэ дайнда Илалтын туйлагдаһаар 75 жэлэй ойдо зорюулагдан “Хэнзэ ногоон” гэһэн зүжэг табигдажа байһанаа, энэ ажал хэдэн һара тогтошоһон байна. Мүнөө энэ зүжэг саашадаа бэлдэгдэжэ эхилбэ. Александр Островскиин “Гроза”, Леонид Ирина Воронтоной “Судьба в чемодане”, Уильям Шекспирэй “Отелло” болон хүүгэдтэ зорюулагдаһан онтохон ээлжээтэ хаһада табигдаха түсэбтэй, - гэжэ Саян Жамбалов онсолно.

 Яажа уулзахабибди?

Эдэ зүжэгүүдые хүн зон яажа харахаб: театртамнай ерэжэ гү, али онлайн аргаар хараха аргатай болохые – мүнөө хэншье багсаамжалан хэлэхэ аргагүй. Театрта ерэжэ хоёр нюдөөрөө хараха, хоёр шэхээрээ шагнаха гээшэ юунһээшье дээрэ. Харин зүжэг наадаяа видео буулгабари хэжэ, тэрэниие сэнхир экранаар хараха арга ехэ хүлгөөтэй байна. Тиин бэлигтэй артистнар ямаршье аргаар харагшадтаяа уулзаха хүсэлтэй.

Мүнөө онлайн аргаар олон конкурснууд болоно. “ТЕАТР ФЕСТ” – 2020 гэһэн уласхоорондын II-хи фестиваль онлайн аргаар Болгарида үнгэрхэнь. Манай театр тус хэмжээндэ “Полёт. Бильчирская история” зүжэгөө дурадхаад байна.  Түрүүшын шата амжалтатайгаар гараад, саашаа хоёрходи шэлэн абалгын шатада ороод байнабди. Август һарада дүнгүүд гаргагдаха.

Намартаа Хабаровск хотодо мүн лэ театральна ехэ фестиваль үнгэрхөөр түсэблэгдөөд байна. Бидэ хабаадалсаха һанаатай байнабди. Саашадаа ямар байдал тохёолдожо, юуншье боложо магад. Тиин сентябриин 18-да ээлжээтэ хаһаяа нээхэ һанаатай байнабди, - гээд Саян Жамбалов хөөрэнэ.

 Шэнэ халаан бэлэн

89-хи театральна хаһамнай ехэ зохидоор эхилхэнь. Борис Щукинай нэрэмжэтэ театральна һуралсалай дээдэ эмхиин буряад студи дүүргэһэн хүбүүд басагад манда ерээ. Талаан бэлиг ехэтэй залуушуул оюутад байха хаһадаа олон харагшадай һайшаалда хүртэһэн байна.

Энэл һуралсалай эмхиин уран һайханай талаар эмхидхэн табигша шэглэлээр Виктор Жалцанов һуража гараба. Залуушье һаа, мэдээжэ болоод ябаһан Олег Юмов манай театрта хүдэлхэнь.

    Август һарада “Шэнэ буряад зүжэг” гэһэн шэглэлээр ябуулагдажа байһан ажал түгэсэхэнь. Мартын эхиндэ энэ ажал ябуулагдажа эхилээд, мүнөө онлайн аргын хүсөөр дүүргэгдэжэ байна. Энэ һонин ажалай дүн буряад хэлэн дээрэ олондо харуулагдаха.

Арадай театр бүхэндэ мүнөө үеын драматурги орёошог байдалтай. Олон пьесэ зүжэгүүд саарһан дээрэ зохёогдобошье, тэрэнииень саашань зүжэг болгожо, олондо харуулхань хүндэ. “Шэнэ буряад зүжэг” эмхидхэһэн бэлигтэй Анастасия Букреевагай аша туһаар хэдэн пьесэнүүд табигдажа, театрай репертуарта оруулагдаха болобо.

 Бузар үбшэн тухай

Хаа хаанагүй һүжэрһэн энэ мухай үбшэн бүхы театрнуудай ажал хүдэлмэри хэдэн һараар зогсоогоо. Бүхы зохёохы ажал тогтошоо. Тиибэшье, хэдэн һарын туршада хэжэ байһан ажал хэрэг дахин шэнээр сэгнэхэ, шүүмжэлхэ саг ехэ байгаа. Шэнэ онол аргануудые хэрэглэжэ, зүжэг наадануудые бэлдэхэ тухай олон һанамжанууд зохёохы бүлгэмэй ухаан бодолдо түрэнэ. Намар нээгдэхэеэ байһан удаадахи шэнэ хаһадаа бэелүүлхэ түсэбүүд тодорхойлогдоо.