Арьяа Баала бурхан Санагадаа заларба

Захааминай аймагай Санага нютагай түлөөлэгшэд энэ нангин үдэрые Буддын заншалта Сангхын Бандидо хамба лама Дамба Аюшеевтэ энэ үдэр харуулжа,   бурханайнгаа хүрэг бэе нютагтаа залаба.

 Нурселение тосхоной Батожабайн нэрэмжэтэ үйлсын 6-хи гэртэ үглөөнэй зон олоороо сугларжа, Арьяа Баала бурхаяа нютагтань мордуулба. Ашаанай ута авто унаа зорюута Захааминһаа ерэжэ,  бурханай бэеын дорохи табсан түрүүлэн абаашаба.

Һүүлэй гурбан жэлэй туршада Санагын, Захааминай арад зон  болон ниигүүлэсхы сэдьхэлтэй хүнүүдэй аша туһаар 41 метр үндэртэй бурханай хүрэг бэе бүтээхэ ехэ ажал ябуулаа. Захааминһаа уг гарбалтай, гартаа уран бэрхэ, зурааша Юрий Мандаганов энэ буянта хэрэгые ударидажа ябана.

Зунай дүүрэтэр бурханай хүрэг хэдэн хуби хубаагдаад, Санага нютаг залуулагдаха.

Мүнөө санагынхид нангин шүтөөнэй һүл тэмдэгэй нютагтаа хүрэжэ ерэхые хүлеэжэ байна. Үглөөдэр үглөөнэй арбан сагта Арьяа Баала бурха угтаха талаар хэмжээнүүд эхилхэ. Санага нютагта ажаһуудаг зон буряад дэгэлнүүдээ үмдэжэ, булта хадагуудые баряад, урда сэлеэнһээ эхилээд дасан хүрэтэр харгыда бурхаяа угтаха. Энэ  хэрэгтэ хүн бүхэн, илангаяа Газар дэбисхэрэй олониитын өөһэдын  хүтэлбэринүүд эгээл эдибхитэйгээр хабаадана. Зунай туршада ТОС-уудай гэшүүд  дасан ошожо, энэ ехэ үйлэдэ хабаатай. «Мүрэ», «Алтан гуургалдай», «Спорт», «Таёжный» ТОС-уудай ажаһуугшад алишье сагта Санага нютагта болодог бүхы ажал ябуулгада өөһэдынгөө хубитые оруулдаг гэжэ онсо тэмдэглэе.