"Энеэлдэе" бултадаа

Энэ мүрысөөндэ хэдышье наһатай, ямаршье яһатан хабаадаха эрхэтэй. Гэхэтэй хамта хабаадагша заал һаа буряад хэлэн дээрэ зураглал буулгажа, жюрин анхаралда дурадхаха болоно.

Мүрысөөндэ хабаадагшад дүрбэн номинацида буулгабаринуудые дурадхаха аргатай.

«Энеэлдэе» гэһэн энеэдэтэй ролик, вайнууд – нэгэдэхи номинаци болоно. Эндэ ямаршье зохид буулгабари  таараха. Тэрэнэй үргэлжэл 1 минутаһаа ута байжа болохогүй.

«Нютагайм һонинууд» - хоёрдохи номинацида энеэдэтэй мэдээсэлтэй сюжет бэлдэхэ хэрэгтэй.

«Хүхюу хонхо» - гурбадахи номинацида һургуулиин түүхэ ушарнууд тухай.

«Зар тунхаг»- дүрбэдэхи номинаци хадаа, элдэб реклама тухай буулгабари эльгээжэ болохо.

Гурбан һүүлшын номинацинуудта эльгээгдэһэн буулгабаринууд 3 минутын байха ёһотой.

Байгша оной сентябриин 18 болотор энэ мүрысөөндэ бэлдэһэн зураглалнуудаа kddrс[email protected] хаягаар «ЭНЕЭЛДЭЕ» гэжэ бэшээд эльгээхэ хэрэгтэй.

Мүрысөөндэ хабаадагшад нэр обогоо, бэлдэһэн зураглалайнгаа нэрэ, номинаци тухай мэдээсэл тодорхойгоор бэшээд эльгээхэ шухала. Шанараараа муу зураглалнуудые жюри харахагүй.

Сентябриин 21-һээ октябриин 5 болотор жюри эльгээгдэһэн хүдэлмэринүүдые хаража, эмхидхэлэй хорооной зүблөөл боложо, дүнгүүд гаргагдаха. Гадна энэл хугасаа соо Буряад Уласай Соёлой яаманай сайт дээрээ дуу үгэлгэн үнгэргэгдэжэ, олоной һайшаалда хүртэһэн буулгабари элирүүлэгдэхэ.

Октябрь һарада гол шангууд барюулагдажа, Буряад хэлэнэй үдэртэ дашарамдуулагдаһан концертдэ амжалта туйлаһан зураглалнууд харуулагдаха, - гээд РЦНТ-эйн мэргэжэлтэд мэдээсэнэ.