​Буряадай драмын театрта шэнэ артистнууд

Залуу артистнууд – Игорь Раднаев, Арюна Цыденова, Бато Шойнжонов, Раиса Бадмаева, Дахалэ Жамбалов, Бальжан Арданбазарова, үшөө тиихэдэнь Булат Буралов, Алас Дурнын урлалай академи дүүргэгшэ, Буряадай драмын театрай бүлэг​ руу оробо. Тэдэнэр «Гроза» болон «Хэнзэ ногоон» гэһэн зүжэгүүдтэ хабаадалсана, - гэжэ дуулганабди.
Буряад Уласай болон Дотор Монголой нютаг аймагуудай бэлигтэй залуушуул 2016 ондо Бурдрамда һайнаар шалгалта барижа, суутай Борис Щукинэй нэрэмжэтэ Театральна дээдэ һургуулида һурахаяа эльгээгдэһэн.
Дүрбэн жэлэй туршада Москва хотодо суута Людмила Ворошилова, Павел Любимцев, Галина Сазонова, Валерий Маркин, Владимир Сажин, Наталья Павленко, Анна Дубровская  багшанарай ашаар  зүжэгшэнэй уран шадабари мүлирүүлээ һэн.
Халдабарита үбшэнэй​ үедэ​ тэдэнэр шалгалтануудаа амжалтатайгаар тушаагаа.​ Вахтанговай нэрэмжэтэ театрай хүтэлбэрилэгшэ Римас Туминас шалгалтын комиссиин гэшүүн байгаа.
Буряад театрай  үшөө нэгэ артист  Булат Буралов ерээ. 2017 ондо Алас Дурнын урлалай академи дүүргэһэн. Булат хадаа диплом абаад, Баргажан аймагай Улюн нютагайнгаа Соёлой ордондо ажаллаа,​ хоёр жэл  сэрэгэй алба гараа.
Үшөө тиихэдэ, Щукинэй нэрэмжэтэ институудай уран һайханай талаар эмхидхэлгын факультет дүүргэһэн Виктор Жалсанов ажалда ороо. Тэрэнэй​ «Наян Наваа» гэһэн​ шалгалтын ажал энэ жэлэй​ февраль һарада Бурдрамын тайзан дээрэ түрүүшынхиеэ табигдаһан.