​Буряад уласта Оюунай ба эдэй соёлой ехэ наадан эмхидхэгдэхэнь

XII-дугаар Бандида Хамба лама Даши-Доржо Этигэловтэ зорюулагдаһан Оюунай ба эдэй соёлой ехэ наадан Буряад орондо эмхидхэгдэхэнь.

Гэгээн түрэлтэ Багшада үргэл хэхэ, мүн һүгэдэн зальбархын тула уран бэлигтэнэй зохёохы хүсэ элсүүлхэ зорилготой тус ехэ нааданай үедэ арадай гар урлалай бүтээлнүүдэй урилдаан-үзэсхэлэн үнгэргэгдэхөөр хараалагдана.

Буддын шажанай соёлой, Буддын шажанай номнолой, Буряадай дасан дугануудай, нангин газарнуудай асари ехэ хүсэ алдаршуулха, мүн XII-дугаар Бандида Хамба лама Даши-Доржо Этигэловэй ба суута лама санаартанай һургаал дэлгэрүүлхэ талаар зохёохы ажалнууд тус ехэ нааданай үедэ дурадхагдаха.

- Уласаймнай аймаг бүхэнһөө уран гартай дархашуул ба бусад зохёохы ажалтан Этигэлэй Хамба ламада үргэлөө хэнгээ, адистань хүртэхэ юм, - гэжэ Арадай уран бэлигэй түбэй ажалшад дуулгана.

Эрхим бүтээлнүүдэй үзэсхэлэн Ивалгын дасанай дэргэдэ сентябриин 21-дэ дэлгэгдэхэ. Модоор, үйһөөр, арһаар, түмэрөөр, яһаар, шулуугаар, адуунай дэлһээр, һэеыгээр уран һайханай бүтээлнүүдые хэдэг зонһоо гадна, оёдолшодшье хабаадаха. Тус үзэсхэлэндэ дэлгэгдэһэн зүйлнүүд үргэн олониитын һонорто Интернедэй ашаар хүргэгдэхэ гэжэ тэмдэглэлтэй.