400
Арбан жэлэй түүхэтэй уласхоорондын "Online EBEFF-2020" мүрысөөн энэ зун онлайн аргаар эмхидхэгдэжэ, 15 гүрэнүүдэй 30 хотонуудһаа үндэһэн хубсаһанай 70 суглуулбари дэлгэгдэһэн байна. Уласхоорондын мүрысөөндэ Буряадай мэдээжэ дизайнер Евгения Мэрдыгеева болон гэрэл зураг буулгагша Алима Салбаева хабаадаа.
Тэдэнэр үндэһэн буряад хубсаһанай «Хатан» гэһэн суглуулбари мүрысөөндэ бэлдэһэн байна. Тус түсэл «Ая-Ганга» эмхиин түрүүлэгшэ, олониитын ажал ябуулагша Руфина Уюина хүтэлбэрилөө.
Июлиин 29-дэ, 31-дэ жюриин гэшүүд болон мүрысөөндэ оролсогшод онлайн аргаар уулзаһан байна. Мүрысөөнэй дүнгүүдээр, «Заншалта болон тайзанай хубсаһан» гэһэн шэглэлдэ Евгения Мэрдыгеева «Хатан» сугуулбаритаяа түрүүлээ. Гэрэл зураг буулгагша «Гэрэл зураг» гэһэн шэглэлдэ баһал түрүү һуури эзэлээ.
Мүрысөө эмхидхэгшэдэй тэмдэглэһээр, шангай һуури эзэлэгшэд энэ түсэлэй намарай Warsaw Fashion Textile Fair гэһэн хэмжээ ябуулгада хабаадаха аргатай болоно. Уласхоорондын хэмжээ ябуулга байгша оной ноябриин 18-20-ой үдэрнүүдтэ Варшава хотодо үнгэргэгдэхөөр түсэблэгдэнхэй.
Үбэлэй үндэһэн хубсаһанай уласай фестиваль-мүрысөөндэ Евгения Мэрдыгеева Гран-при шанда хүртөө гээд һануулнабди.
Источник: Буряад Уласай соёлой яаман
Фото: Буряад Уласай соёлой яаман
