Соёл уралиг 20 aug 2020 496

​Олон харагшадтай Zhagi Di

Залуушуулай дунда Zhagi Di гээд мэдээжэ Жаргал Базаргармаев «Хүсөөтэм» гэжэ тоонто нютагтаа зорюулһан дуунай клип hаяхана буулгуулба. Суута кинонуудай энеэдэтэй хэhэгүүдые буряадаар оршуулжа дууряадаг энэ залуу хүбүүнтэй хөөрэлдөө эмхидхэбэбди.

- Сайн байна, Жаргал! Нэн түрүүн амаршалнаб! Хэды хугасаада энэ клипшни бүтэбэ гээшэб?

- «Зүрхэндэм хайратай минии Хүсөөтэм» гэжэ дуунай үгэ нёдондо август hарада зосоом түрөө бэлэй. Бага наhаяа дурсаад, түрэл нютагтаа дураяа мэдүүлхэ хүсэл тиихэдэ аргагүй ехэ байгаа. Дүрбэхэн үгэнүүдһээ эхи абаад, саашадаа шүлэг мүндэлөө, хүгжэм, клип бүтэн жэлэй турша соо бэшэгдээ. Баян Цыренов гэжэ һайн нүхэрни видео буулгаа. Гадна гитарист, вокалист болон морин хуур гүйсэдхэгшэдэй бүхэли үбэлэй туршада хэһэн ажалайнь дүн болоно. Намда этигэжэ, туһа хүргэгшэдтэ ехэ баяртайб. Гэртэхиндээ, нүхэдтөө, нютагаархидтаа баярые хүргэнэб.

- Хүгжэмшэнэй ажал юундэ шэлээбши? Бүхыдөө хэды дуу зохёожо, клип бэшээбши? Хип-хоп шэглэлдэ шэлжэн оронхой гүш?

- Чайковскийн нэрэмжэтэ хүгжэмэй колледждо Татьяна Андреановна Васильева (хоровое дирижирование) гэжэ бэрхэ багшада һуража гараа хүм. Юуниинь харамтайб гэхэдэ, Зүүн Сибириин соёлой ба уралигай дээдэ hургуули түгэсхэнгүй орхёоб. Тиибэшье дахинаа бусажа дүүргэхэ һанаан бии.

Бэшэhэн дуунуудайм тоо хэлэхын аргагүй: үшөө дүүргээгүй, али ганса өөрөө бэшэ, харин олон залуушуултай хамта зохёоhон дуунууд байха. Тиигээд «нара хараһан» һүүлэй үеын дуунуудни - «Бү мартаарай» (2018), «Хөөрхэн», «Yглөө нүгөө», «Дулаан үдэшэ», «Ниидэе», «Шинии үбэлэй дуун» (2019), «Yглөөгүүр», «Хүсөөтэм» (2020).

Һүүлэй сагта «Yглөөгүүр» болон «Хүсөөтэм» гэжэ хоёр дуунуудтаа клип буулгууланхайб. Саашадаа бүри амжалтатайгаар хүдэлжэ, шэнэ бүтээлнүүдые ниитэлүүлхэл байхаб.

Хип-хоп шэглэл гансал «Хүсөөтэм» гэжэ дуун соогоо хэрэглээб. Юундэб гэхэдэ, 1990-ээд онуудта манай гүрэндэ хип-хоп шэглэлэй бии боложо байхадань, хари гүрэнэй болон манай ород дуушадые шагнажа үндыгөөб. Тиимэһээ ехэнхи залуушуулай һанаанда хип-хоп жанр тааруу зохид байха гэжэ һананаб.

- Дуунуудаа хаана бэшэнэ?

- Абяа буулгадаг студитайбди. Манай студида абьяас бэлигтэй залуушуул яһала олон. Ерээдүйдэ өөһэд тухайгаа мэдүүлхэл байха гэжэ этигэнэб.

- Инстаграм сүлжээндэ элдэб фильмhээ хэhэгүүдые буряадшалдаг байнаш. Юундэ тиимэ бодол шамда ерээб? Хэды зон лайк табиһан байнаб? Теэд һүүлэй үедэ шэнэ ажалнууд хоморой гэжэ харанаб.

- Энеэдэтэй юумэ хэжэ шадахаб гэжэ анханай мэдэдэг, һанадаг байгааб. Тиимэһээ толгой соом нэгэ бодол ороо һаань, бэелүүлхын тулада мэдээжэ фильмhээ хэhэг бэдэрээд, дуугаржа байхадань, дууряагаад оршуулхадамни, хүн һонирхожо харадаг. Заримдаа бүмбэрсэг дэлхэй дээрэ, гүрэн түрэ соошье, уластамнайшье боложо байһан үйлэ ушарта зорюулаад хэхэдэмнишье, олон зон хараад лэ байдаг. Жэшээнь, «Мстители», «Гарри Поттер», «Один дома», «Плохие парни-2» гэжэ фильмһээ хэhэгүүд тон ехэ һонирхол татажа, эгээл ехэдээ 42 463 харагшадтай болоо.

Харин бэшэhэн клипүүдыем 10 мянган хүн хараад байна. Нэн түрүүн энеэдэтэй хэhэгүүдээрни хүн зон һонирхоод, хүгжэмэй талаар хэһэн ажалдам анхаралаа табяа ха.

Карантинай үеһөө эхилээд, хүгжэмэй талаар ажалаа ябуулжа, харагшадаа шэнэ оршуулһан хэсэгүүдээр баярлуулха сүлөөмни таhалдаад байна. Теэд заатагүй тэрэ ажалдаа бусахаб гэжэ найдуулнаб.

- Шэнэ-шэнэ бүтээлнүүдые зохёожо, олоной hонирхол татажал байгыш даа!

Автор: Гэрэлма ЖИГДЫЛМЕЕВА