395
Бэлэдхэлгын бүлгэмэй бүридэлдэ режиссер-найруулагша Юрий Лаптев, дирижер Леонид Корчмар, уран зурааша Сергей Новиков, гэрэлэй талаар найруулагша Василий Ковалев, балетмейстер Владимир Романовский, хормейстер Дарима Линховоин, Наталия Селиванова, Саян Манжигеев, Елена Березовская, Александра Васильева гэгшэд оруулагданхай.
Найруулагша Юрий Лаптев Орос Уласай арадай артист, Мариинска театрай найруулагша, 2016-2018 онуудта Буряадай театрта хүдэлhэн гээд hануулая. Тэрэ Буряадай оперо болон баледэй театрай тайзан дээрэ зурган зүжэг табиhан габьяатай. Тэдэнэй тоодо мэдээжэ, олоной hайшаалда хүртэhэн «Кармен», «Тоска», «Бал-маскарад» болон «Риголетто» зүжэгүүд. Юрий Лаптев Орос Уласай габьяата артист Мариинска театрай дирижер Александр Бородинтай хамта «Князь Игорь» зүжэг табина. Тус зүжэг бэлигтэйшүүлэй хамта табиhан табадахи бүтээл болоно.
Энэ зүжэг анха түрүүшынхиеэ Буряадта 1950 ондо табигдаhан түүхэтэй. Дахинаа 1959 ондо харагшадай анхаралда дурадхагдажа, театрай алтан жасада оруулагдаhан юм. Буряадай мэдээжэ артиснар Лхасаран Линховоин, Саян Раднаев, Бадма Балдаков, Ким Базарсадаев гэгшэд түрүү партинуудые гүйсэдхэдэг байhан.
Олоной анхаралда дурадхагдаха зүжэг Оросой Холбоото Уласай соёлой яаманай туhаламжаар бэлдэгдэнэ. Орос Улас дотор оройдоол 15 театр туhаламжада хүртэжэ, манай театр 13 сая түхэригѳѳр дэмжэгдээ.
Буряадай оперо болон баледэй театрай ээлжээтэ хаhын хэзээ нээгдэхэнь, хамшагта үбшэнэй тараhан ушарhаа мэдэгдэнэгүй. Энэ соелой эмхиин ажалаа эхилхэ тухай шиидхэбэри коронавирус үбшэнэй дэлгэрхэгүйн тула байгуулагдаһан уласай штабта абтаха ёhотой. Харин «Князь Игорь» зүжэгэй премьерэ байгша оной декабрь hарада болохоор хараалагдана.
Фото: Буряад Уласай соёлой яаман
