​Үзэсхэлэн эмхидхэгшэдэ – үндэр шан

Соёл уралиг хүгжөөхэ хэрэгтэ олон жэлнүүдэй туршада горитой хубита оруулһанайнгаа ашаар «Буряад Уласай урда аша габьяагай түлөө» гэжэ медаляар уран һайханай үзэсхэлэнгүүдые эмхидхэгшэ Константин Ханхалаев дэбжүүлэгдэбэ.

Буряад Уласай Толгойлогшо тусхай зар­лиг гаргажа моторлобо. Ехэ-ехэ 50 гаран үзэсхэлэн бүхэроссиин үргэн олониитэдэ «Ханхалаев» гэжэ ниитэ гаршаг доро харуулаг­даа. Москва, Санкт-Петербург, Екатеринбург, Томск, Красноярск, Эрхүү, Улаан-Үдэ хотонуу­дай түрүү музейнүүдтэй хани барисаа тогтоо­хынгоо хажуугаар Константин Казакович хари гүрэнүүдтэ ажаһуудаг олон арадуудта ород, буряад соёл уралигай дээжыень хүртөөһэн габьяатай. Великобритани, Америкын Холбо­ото Штадууд, Хитад, Франци, Япони, Бельги, Люксембург, Швейцари, Монгол, Сингапур, Гонконг, Тайвань гүрэнүүдээр Ханхалаев гуайн ажал ябуулга эсэслэнэгүй. Дэлхэйн олон гүрэнүүдтэ саг үргэлжэ эмхидхэгдэдэг уралигай ехэ үзэсхэлэнгүүд Ханхалаевгүйгөөр үнгэрдэггүй. Арт-Майами (Америкын Холбоо­то Штадууд), Арт-Экспо-Нью-Йорк (Америкын Холбоото Штадууд), Арт-Тайбей (Тайвань), нарин уралигай Москвадахи уласхоорондын үзэсхэлэн (Ородой Холбоото Улас), Арт-Стейдж Сингапур болон бусад.