500
Шэнэ номуудтай танилсалга, һонин хүнүүдтэй уулзалга, дүхэриг шэрэнүүд, лекцинүүд Yндэhэтэнэй номой сангай тусхай сайт дээрэ болон ВКонтакте, YouTubе-тэ сэхэ дамжуулагдаха.
Октябриин 7-до үдэшын 18.30 сагта сэхэ дамжуулгаар салон нээлгын ёһолол харуулагдаха. Хорин табан жэлэй туршада эмхидхэгдэһэн хэмжээнүүдэй гэрэл зурагууд, эрхим номуудай тоодо ороһон хэблэлнүүдэй үзэмжэ дэлгээгдэхэ. Энэ салон анха түрүүн эмхидхэжэ, заншалта болгоһон Эльвира Тумуноватай уулзалга болохо.
Ород Уласай мэдээжэ зүжэгшэн, уран зохёолшо, «Дни Савелия» роман зохёогшо Григорий Служительтэй сэхэ харилсаан тогтоогдожо, ном уншаха дуратайшуул хѳѳрэлдэхэ аргатай.
Октябриин 8-да, 9-дэ номуудые хэблэжэ гаргаһан шүлэгшэд, уран зохёолшод нара хараһан номуудтайгаа танилсуулжа, саашадаа ябуулагдаха ажал, түсэбүүдээрээ хубаалдаха. Татьяна Хамаганова, Аркадий Перенов, Николай Дудко, Анна Банаева, Татьяна Никитина, Булат Зориктуев, Доржи Намсараев, Светлана Нестерова, Владимир Банзаракцаев, Ника Светлая, Евгений Голубев, Эдуард Бочкин, Надежда Уланова, Галина Раднаева, Дулгар Доржиева, Евгения Мункуева, Александра Дугарова, Анна Виноградова, Юрий Невский, Нина Артугаева, Сергей Басаев, Александр Тармаханов, Тимур Дугаржапов, Баясхалан Дабаин гэгшэд номой салонай хүндэтэ айлшад. «Байгал» сэтгүүлэй болон Буряад Уласта ажалаа ябуулдаг хэблэлэй эмхинүүд бүтээлнүүдээ олоной сэгнэлдэ табиха.
Сентябриин 28-һаа октябриин 2 болотор уран зохёолой харгыда гаража байһан залуу бэшээшэдэй хабаадалгатайгаар уран зохёолой хэмжээн үнгэргэгдэнэ. Эдэнэртэй поэт Амарсана Улзытуев (Улаан - Үдэ), шэнжэлэгшэ Максим Амелин , оршуулагша, уран зохёолшо Андрей Волос (Москва хото) дүршэлөөрөө хубаалдажа, сэнтэй зүбшөөлнүүдые үгэхэ. Номой салонай дүнгүүд октябриин 9-дэ согсологдохо.
Фото: minkult.rb
