«Гэсэр» үльгэр түүрээгшэд

«Гэсэр» үльгэрэй 1025 жэлдэ зорюулагдан, «Хүхэ мүнхэ тэнгэри доро» гэжэ нэрлэгдэһэн уран уншалгын хараглан   Буряад Уласта үнгэргэгдэбэ.  Шэлэн абалгын шата октябрь һарын эхиндэ мэргэжэлэй дунда  болон дээдэ эмхинүүдэй оюутадай дунда болоо. Түгэсхэлэй шатада 44 хабаадагшад шэлэн абтаа.
Харалганай шүүгшэд «Гэсэр» үльгэр түүрээгшэдые шэлэхэдээ, тэдэнэй бэлиг шадабариие,  уран үгые, онсо маягые анхаралтайгаар адаглаа. Олон хабаадагшад жюрин гэшүүдые баярлуулаа, олоной үндэр сэгнэлтэдэ хүртөө. 
Харалганай Гран-при шанда Буряадай үндэһэтэнэй мэдээсэлэй болон экономикын техникумай оюутан Максим Шабаевта олгуулагдаа. Шангай нэгэдэхи һуури П. Чайковскын нэрэмжэтэ Урлалай колледжын оюутан Дмитрий Ухнаев эзэлбэ. Буряадай үндэһэтэнэй мэдээсэлэй болон экономикын техникумай үшөө нэгэ түлөөлэгшэ Валерия Старикова шангай хоёрдохи һуури эзэлжэ шадаа. Шангай гурбадахи һуури Зүүн Сибириин гүрэнэй технологическа ехэ һургуулиин бэлигтэй оюутад Золто Доржиев, Владислав Ячменёв хоёр эзэлээ. 
Эдээнһээ гадна Буряадай ойн ажахын техникумай оюутан А. Гульковагай болон Технологическа ехэ һургуулиин оюутан Д. Самсоновагай бэлигтэй байһые эмхидхэлэй хорооной гэшүүд тэмдэглээ.