Дээдын үзэмжэлиг

Кремлиин Оружейнэ палата соо түүхын дурасхаалта баян нөөсэ хадагалагдажа байдаг. Ородой сэрэгэй алдар солын, гүрэнэй засагай эртэ урдын һүлдэ тэмдэгүүд шэллэгдэмэл шкафууд соо онсо һуурияа эзэлэнхэй.

Кремлиин мастерской соо бүтээгдэһэн урда сагай үнэтэ хэрэгсэлнүүд, олон ондоо гүрэн түрэнүүдэй толгойлогшодой бэлэгүүд үзэсхэлэн шэмэгүүд болодог.

Анхан эртэ сагһаа буу зэбсэг бүтээлгэ яагаад хүгжөө һэм, эгээл мэргэн буунуудай үйлэдбэрилгэ ямар байгааб гэжэ эндэ табигдаһан экспонадууд гэршэлнэ.

Алта мүнгөөр хэгдэһэн зүйлнүүдэй суглуулбари нюдэ хужарлуулна. Дэлхэйн шэмэгэй дээжэ, оройн залаа зүүдхэл гээд нэрлэмээр. Хаанууд хатануудай хубсаһан үзэмжэ гоёороо гайхуулна. Илангаяа суута Екатерина II хатанай үмдэдэг байһан титим, плати, үнэн алдарта шажантанай үндэр тушаалдаа үргэмжэлэгдэхэдөө үмдэдэг байһан хубсаһан энэ согсолбори соо үлэмжэ илгардаг.

Кремлиин томо байшангай баялиг нөөсын хуби болохо Оружейнэ палатые дээдын үзэмжэлиг музей гээд нэрлэжэ болохо юм.