Буряад Уласта "Эрхим зүжэгүүд» гэһэн ном хэблэгдэбэ

Номдо  байгша оной октябрь һарада Буряад Улас дотор  эмхидхэгдэһэн харалганда хабаадалсажа, үндэр сэгнэлтэдэ хүртэһэн табан зүжэгүүд оруулагдаа. Дарима Башкуевагай «Төөриһэн мүшэнэй толон»,  Дугарма Цыреновагай «Долоон үдэр»,  Цырегма Сампиловагай «Һэшхэлэй тэнсүүри»,  Жаргал Жербаевай «Yйлын үри»,  Сергей Баяндуевай «Ямар айлшан манайда ерэбэ гээшэб?» зүжэгүүдтэй олон зон танилсаха аргатай болобо.

Жюрин гэшүүн, мэдээжэ найруулагша Баярма Жалцановагай тэмдэглэһээр:

Энэ жэлдэ эмхидхэгдэһэн харалган урда жэлнүүдэйхидэ орходоо үндэр хэмжээндэ үнгэрөө. Жюриин гэшүүд дурадхагдаһан зүжэгүүдые уншахадаа хэнэй бэшэһэн зохёол гэжэ мэдээшьегүй. Зарим зохёолнууд түрүүшын мүрнүүдһээ эхилээд, дүүрэтэрээ манай  һонирхол татаа. Юрын зоной ажабайдал, тэдэнэй бэрхэшээлнүүдые зураглаһан зохёолнууд олондо һайшаагдаха байха».