677
Буряад хэлэн дээрэ буулгагдаһан шог ёгто видеобуулгабаринуудай мүрысөөн уластамнай эмхидхэгдэжэ, дүнгүүдынь соносхогдобо.
Түнхэнэй аймагай түлөөлэгшэд мүрысөөнэй Гран-при шанда хүртэбэ гээд, Буряад Уласай соёлой яаманай мэдээсэлэй албан дуулгана. Хэрэнэй арадай театрай найруулагша Валентина Базаровагай бэлдэһэн видео түрүү һуури эзэлжэ, «Энеэлдэе!» гэһэн уласаймнай мүрысөөнэй гол шан абажа, 20 мянган түхэригөөр шагнагдаба.
Хэрэнэй арадай театр «Жолоошон ба инспектор» гэжэ энеэдэтэй клип буулгажа, энэ урилдаанда эльгээһэн байна. Богонихон, хэдэн минутын үргэлжэлэлтэй шог ёгто зураглалай гол геройнууд Иван Дармахеев болон Валентина Базарова хоёр абьяас бэлигтэйгээр наадажа, хошон зугаатай клипынь интернет сүлжээндэ ехээр таража, олоной дура буляаба.
«Буряад Уласта буряад хэлэ хүгжөөхэ» үнгэргэһэн мүрысөөндэ бүхыдөө 60 гаран хабаадагшад бэлиг талаангаа туршаба. Эдэ ажалнуудынь YouTube сүлжээндэ хаража болохо юм.
Автор: Бэлигто ЦЫРЕНДОРЖИЕВ
Фото: Буряад Уласай соёлой яаман
