Буряад Уласай циркын алтан амжалта

Тверь хотодо эдэ үдэрнүүдтэ «На языке мира» гэжэ нэрлэгдэһэн хүүгэдэй болон залуушуулай дунда циркын уласхоорондын фестиваль үнгэрбэ.

Тус фестивалиин алтан медальда Буряадай циркын бүлэг басагад хүртэбэ.

«Богини Байкала» гэһэн тусхайта номер харуулһан басагад олоной үндэр сэгнэлтэ абаа.

 Онлайн аргаар эмхидхэгдэһэн фестивальда Азербайджан, Аргентина, Армени, Белорусси, Венгри, Вьетнам, Германи, Израиль, Хитад, Монгол, Перу, Америкын Холбоото Штадуудай,  Итали, Колумби, Мексикэ, Украина, Эфиопи, Эквадор гүрэнүүдэй зуун табин түлөөлэгшэд  хабаадаһан байна.

 Уян нугархай бэетэй басагад ехэ бэлэдхэл хэжэ, зохид номер олондо дурадхаа. Буряад Уласай Соёлой яаман мүнгэн тэдхэмжэ үзүүлжэ, Наталья Никитина гоё хубсаһа оёһон байна. Алагуй Егоров ирагуу хүгжэм найруулаа.

Жюрин бүридэлдэ бүхэдэлхэйдэ мэдээжэ циркын түрүү одод  Италиин Фабио Монтико, Канадын дю Солей циркын захирал Павел Котов, Франциин Сен-Поль-ле-Даксе циркын президент Брюно Лалой болон Ородой Холбоото Уласай гүрэнэй циркын захирал Владимир Шемякин гэгшэд ороһон гээд хэлэе.