272
Эрэмдэг бэетэй зоной дунда эмхидхэгдэдэг "Родники творчества" гээд нэрлэгдэhэн уласай 7-дохи фестиваль үнгэрбэ. Пандемиhээ боложо, энэ хэмжээ ябуулга дистанционно аргаар эмхидхэгдээ. Видео дээрэ номернуудаа буулгаад, жюриин анхаралда эльгээhэн байна.
Фестивальда уран hайханай бүлгэмүүд, дуушад хабаадаа. Дуушадай ансамбль, эстрадна болон арадай вокал, дуэт, трио, мүн тиихэдэ хатаршад, уран hайханай үгэ, зэр зэмсэг дээрэ дүүргэлтэ гэhэн элдэб номинацинуудаар номернууд харуулагдаа. Гол түлэб бэе бэетэйгээ харилсалга-иимэ зорилго хабаадагшад урдаа табиhан байна.
"Эрэмдэг бэетэй зон өөрыгөө харуулжа, ходо гэртээ hууха бэшэ, уран бэлигээ олоной үзэмжэдэ харуулха зорилго нэн түрүүн табигдаhан байна", - гэжэ хүн зониие социальна хамгаалгын талаар Улаан-Үдэ хотын хүтэлбэриин дарга Анатолий Печкин хэлэнэ.
Фестивальда дүн хамта 47 мэдүүлгэ ороhон байна. 8 номинацида эрхимүүдые жюри элирүүлээ. Грантын энэ проект бэелүүлэгдэжэ, мүнгэнэй талаhаа hайн дэмжэлгэтэй байгаа.
"Грантын мүнгөөр колонка, микрофонууд, экран абаабди. Шангай жасада 91 мянган түхэриг оруулагдаа", - гэжэ "Эрэмдэг бэетэйшүүлэй бүхэроссиин бүлгэм" гэhэн буряадай региональна таhагай түрүүлэгшэ Владимир Брыков хэлэнэ.
Сибириин федеральна тойрогой дэргэдэ үнгэрхэ фестивальда эндэ эрхимлэгшэд ошожо хабаадаха байна. Тэндэ hайнаар өөрыгөө харуулагшад Москва хото ошожо, буряад ороноо түлөөлхэ байна.
Фото: Буряад уласай ниигэмэй хамгаалгын яаманай мэдээсэлэй албан
