​Танилсагты: Ганжур Цыренов!

«Эдир Будамшуу-2020» урилдаанай дүн согсологдобо. Цырен Шагжинай “Будамшуу” гэжэ алдарта зүжэг нааданай нэрээр нэрлэгдэһэн эдир зүжэгшэдэй энэ урилдаае Ородой Холбоото Уласай арадай зүжэгшэн Михаил Елбонов зохёон байгуулдаг гэжэ дахин һануулхада, үлүү бэшэ байха. Энэ урилдаан 16-дахи жэлээ үнгэрбэ. Михаил Елбонов нэгэтэ эхилһэн ажалаа арба гаран жэл соо үнэн сэхэ эрхилнэ. Энэ ехэ амжалтань Михаил Гомбоевичой гэр бүлэтэй ехэ холбоотой юм. Наһанайнь нүхэр Будаева Галина Дамбаевна, Андрей хүбүүниинь болон Арюна бэринь “Будамшуу” урилдаа эмхидхэхэ ажалые даажа гарадаг гэжэ абаһаар лэ хэлэхэ дуран хүрэнэ. Хүүгэдые театрай уралигтай танилсуулха хэрэгтэ “Будамшуугай” һургуули ехэхэн үүргэ дүүргэнэ. Арба гаран жэл соо олохон лэ хүүгэд Михаил Елбоновой эдир зүжэгшэнэй һургуули гараа. Сагай эрхэ байдалһаа энэ жэл “Эдир Будамшуу” онлайн аргаар үнгэрхэ баатай болоо. Тиигэжэ 45 хүүгэд урилдаанда орохо хүсэлөө мэдүүлжэ, уран бэлигээ үзүүлээ. Урилдаанда ороһон хүүгэд уншаһан шүлэгөө, хөөрэһэн монологоо, дуугаа видео дээрэ бэшээд эльгээгээ юм. Тэдэ ажалнуудыень шүүгшэд хаража, эрхимүүдыень шэлэн байжа гаргаба.

Гран-при шан:

Захаамин аймагай түлөөлэгшэ, 16 наһатай Ганжур Цыренов ехэ шанда хүртэбэ. Ганжур “Би буряадби” гэжэ шүлэг уран һайханаар уншаба. “Буряад хэлэн” гэжэ монолог хөөрэжэ, дуу уянгатуулан гүйсэдхэжэ, шүүгшэдэй үндэр сэгнэлтэдэ хүртэбэ.

1-дэхи һуури:

Монгол Уласай түлөөлэгшэ, Соёл уралигай ехэ һургуулиин “Бадмаараг” лицейн һурагша, 17 наһатай Отгонбаатар Хоссайхан түрүү һуури эзэлбэ. Хүгжэмшэн зүжэгшэнэй мэргэжэлээр һуража байһан хүбүүн гэжэ абаһаар эли байгаа. “Алтаргана” дуу гүйсэдхэбэ, зүжэгһөө хэһэг харуулжа, үндэр сэгнэлтэдэ хүртөө.

2-дохи һуури:

Агын Буряадай тойрогой түлөөлэгшэ, 1 дүгээр Агын дунда һургуулиин һурагша Булат Намдаков 2-дохи һуури эзэлээ.

3-дахи һуури:

Ринчинов Этигэл (Буряад Улас, Аха аймаг, Өөрлигэй дунда һургуули) Хамгушкеев Роман (Эрхүү можо, Оһын аймаг, Үбэсын дунда һургуули) хоёр хүбүүд 3-дахи һуурида гараба.

Тусхай шан:

Мухар-Шэбэр аймагай Хүсөөтын дунда һургуулиин һурагша Бадмаев Эрдэм тусхай шанда хүртэжэ, “Океан” лагерьта (Владивосток хото) амарха путёвкоор урмашуулагдаха болоо.

Саг сагаараа, сахилза хүхөөрөө

2020 оной “Эдир Будамшуу” урилдаанай дүн Михаил Елбонов иигэжэ тайлбарилна:

«Онлайн аргаар үнгэрхэ болоһондонь, һанаамни ехээр зобоо. Хүүгэдэй уран бэлигые видеогоор хараад сэгнэхэдэ, хэсүүл байна. Тайзан дээрэ амиды бэеэрээ хүнэй гаража ерэхэдэнь, тад ондоогоор харагдадаг. Тиигээшье һаа, шэнэ аргаар хүдэлхэдэ, баһал һонин байба. Саг сагаараа, сахилха хүхөөрөө гэдэгтэл, мүнөөнэй үндэр технологи ашаглажа, Интернет хэрэглэжэ, ажалаа хурдан, ашаг үрэтэй болгохо гээшэ баһал хэрэгтэй ха юм.

Соёл уралигта хуу юумэн эли харагдаад лэ байдаг. Манай шүүгшэд шүүхэ ажалаа үнэн шударгыгаар хээ гэжэ һананаб. Олег Дамдинович Бабуев хэдэн жэлдэ энэ урилдаа үнгэргэлсэжэ байдаг, хүүгэдтэ актёрой шадабари заадаг һэн тула шүүхын ажалдашье андагар байха.

Урид жэлнүүдтэ бидэ аймагуудаар ябажа, шэлэлгэ хэжэ, мастер-һургалта үгэжэ, хүүгэдые бэлдэдэг, шэлэдэг байгаабди. Энэ жэл Сэлэнгэ аймаг лэ ошожо үрдеэбди. Жэл бүри “Эдир Будамшуугай” гала-концертын урда тээ Буряад театртаа хото аймагуудһаа абьяаслиг хүүгэдые суглуулжа, хоёр-гурбан үдэрэй туршада репетици хэжэ байгаабди. Хүүгэдтэй хоёр- гурбан үдэр соо хүдэлхэдэ, шал ондоо болоод үгэдэг. Харин энэ жэл үбшэн тахалһаа тиимэ һургалта, бэлдэлгэ болоогүйнь харамтай байба. Нүгөө жэл энэ урилдаамнай ёһо гурим соогоо үнгэрхэ ааб даа. Түрэл театртаа «Будамшуунар» сугларжа, гала-концертэеэ зохёон байгуулхал байхабди.

Эдэ 45 хүүгэдые бэлдэһэн багшанарта, аба эжынэртэнь, соёлой ажалшадта би ехэ баярые хүргэнэб!»

Шүүгшын һанамжа

Ивалгын аймагай Соёлой байшанай хүгжэмэй багша, эстрадын дуушан Виктор Лубсанов энэ урилдаанай шүүгшээр хүдэлһэн байна:

«Би энэ жюридэ түрүүшынхиеэ хабаадажа байнам. Би дуушан мэргэжэлтэй хүн һэн тула, хүүгэдэй дуу сэгнэхэ зорилготой байгааб. Дуу дуулаха хоолойтой хүбүүд байна, саашадаа томо дуушадшье боложо магадгүй. Буряад Уласта, илангаяа аймагуудта гээд хэлэел даа, багшанар хүүгэдтэ хүгжэм дуу заахадаа, хүгжэмэй зэмсэг доро һурганагүй. Хүүгэд смартфон, диктофон шагнаад, дуу дуулажа һурана. Тэрэтнай хүнэй дуу шагнаад дуулана. Тиихэдээ хүгжэмэй хүгжэлтэгүй байна. Хүгжэм дээрэ наадаха хүнүүд бии, теэд хүгжэмэй зэмсэг ходо дуталдана, байгаашье һаа, хуушарһан гү, али заһагдаагүй байдаг. Зарим хүүгэдые харахада, сээжэлдээд лэ уншана, юу хэлэжэ байһанаа өөрөө ойлгоношьегүй хадаа. Сэдьхэлгүйгөөр хэлэнэ. Буряад хэлэтэй хүүгэдые хаража байхада, эли байдаг гээшэ ааб даа. Хэлээ мэдэхэ хүүгэд өөртөө этигэлтэй байдаг, хаража байхада урматай».

Баяр хүргэе!

- Буряад Уласай Соёлой яаманай, Болбосоролой яаманай, Буряад театрай дэмжэлгээр энэ урилдаан үнгэрдэг. Тиихэдэ эбээн тэдхэгшэд баһал туһа нэмэриеэ оруулжа байдаг: барилгын компани “БестПлюс, һунгамал Андриян Зыбынов, ресторан “Баатарай үргөө”, худалдаанай компани “Абсолют”, “Оптика Сэсэг” компани, “Диамед” эмнэлгын түб. Эбээн тэдхэгшэдтээ баярые хүргөөд, ажалдань амжалта хүсэнэбди, - гэжэ Михаил Елбонов хэлэнэ.