Буряад Уласай артист – шэнэ киногой одон

Уран һайханай "Мүнгэн конькинууд» гэһэн кино Ород Улас дотор үсэгэлдэр харуулагдажа эхилбэ. ХХ-дохи зуун жэлэй эхиндэ Санкт-Петербург хотодо боложо байһан үйлэ хэрэгүүд харуулагдана. Инаг дуран, нүхэдэй хани барисаан тухай кино олоной анхарал татана. Гадна багаһаань үншэржэ, хүүгэдэй гэртэ эрэ болоһон табан хүбүүд – киногой гол наадагша нюурнууд болоно. Эдэнэр ааша ябадал гаргабашье, үншэн хүүгэдтэ, эрэ болоһон байшандаа арга боломжоороо туһаламжа хүргэдэг байна. Баяшуулые тоножо, мүнгэ алтыень тулиһан зондо үгэдэг.

Һонирхолтойнь юуб гэхэдэ «Кинослово» бүлгэмэй буулгаһан кинодо Буряад театрай залуу артист Бато Шойнжонов гол рольнуудай нэгыень гүйсэдхэнэ. Москва хотодо Борис Щукинай нэрэмжэтэ театральна институдай гурбадахи курсда һуража байхадаа, амжалтатайгаар кастинг гаража, Чингис гэжэ нэрэтэй хүбүүе наадаха рольдо хүртэһэн байна. Хахад жэлэй туршада кино буулгагдажа, мүнөө олоной анхаралда дурадхагдаба.

Премьерын нэгэдэхи үдэр харагшадай тоо үсөөн байбашье, мүнөөдэрһөө олон хүн Шэнэ жэлэй эди шэдитэй сагта зорюулагдажа буулгагдаһан кино хараха бэзэ", - гээд кинотеатрнуудай хүдэлмэрилэгшэд тэмдэглэнэ.

Коронавирус үбшэнэй һүжэржэ байха сагта бүхы һэргылэмжын дүримүүд  кинотеатрнуудта  шангаар сахигдана. Тиибэшье хүн зон мэдэрэлтэй байжа, нюураа боолтонуудаар хаагаад ябахань шухала.