​Буряадай Хурамхаанай аймагай соёлой байшангууд һэргээгдэнэ

Арзгун болон Сахуули тосхонуудай соёлой байшангууд һэльбэн шэнэлэгдэжэ, декабриин 10-да баярай оршондо нээгдэбэ. «Соёл» гэһэн үндэһэн түсэлэй хэмжээндэ заһабарилагдаһан соёлой байшангуудай нээлгын баяр ёһололдо Буряад Уласай соёлой яаманай сайдай орлогшо Леонид Будаев хабаадажа, нютагай ажаһуугшадые халуунаар амаршалба.

Арзгун тосхоной соёлой байшан шэнэлхэ хэрэгтэ 3,6 сая түхэриг, Сахуулиин соёлой байшанда 3,4 сая түхэриг гүрэнэй һанһаа һомологдоо. Багахан, 500 гаран ажаһуугшадтай, тосхонуудта соёлой байшангууд ехэ үүргэ дүүргэдэг. Эндэл үндэһэн ёһо заншалай, соёл урлалаймнай гуламта болоно ха юм.

Олон жэлэй туршада һайнаар заһабарилагдаагүй, хуушарһан хүдөөгэй борохон гэрнүүдтэ адли болоод байһан соёлой байшангууд һэльбэн шэнэлэгдэжэ, газаа доосоогүй болбосон түхэлтэй болобо. Барилгашад энэ жэлэй туршада хуушаржа һандарһан хушалтыень, үүдэ үрхыень, досоохи шалыень хуу шэнэлжэ, зохидоор тааруулжа хэһэн байна. Нютагай ажаһуугшадай сүлөө сагаа үнгэргэхэдэ, эндэхи соёлой хүдэлмэрилэгшэдэй ажалаа эрхилхэдэнь аятай байдал түхеэрэгдэнхэй. Нэмэжэ хэлэхэдэ, энэл байшангууд соо хүдөөгэй номой сангууд байрладаг юм. Хүдөөгэй уншагшад һаруул, сэбэрхэн оршондо ном һудар уншаха аргатай болобо гээд Буряад Уласай соёлой яаманай мэдээсэлэй албан дуулгана.