​Буряадай Этнографическа музейдэ #Баатарнуудтаа баяр баясхалан хүргэе гэһэн хэмжээ ябуулга соносхогдобо

Халдабарита тахал үбшэнтэй үдэр һүнигүй тэмсэжэ ябаһан эмнэлгын газарай хүдэлмэрилэгшэдые болон Роспотребхиналтын мэргэжэлтэдые дэмжэжэ, тэдэ зондоо туһаламжа үзүүлхэ зорилготойгоор энэ буянтай ябуулга эхилбэ. Тэрэнэй ёһоор хоёр һарын туршада эдэ зон түлбэригүйгөөр музей орохо аргатай байна.

«Эрхим хүндэтэ нүхэдүүд! Буряад Уласайнгаа арад түмэнэй элүүр мэндые хамгаалжа, энэ жэлэй туршада тахал үбшэнтэй тэмсэжэ ябаһан таанадтаа баяр баясхалан хүсэнэбди. Танай үдэр бүриин ажал, хүн бүхэнэйтнай оролдолго, энэрхы һайхан сэдьхэлытнай үндэрөөр сэгнэжэ ябанабди», - гээд, Үбэр Байгалай арадуудай хизаар ороноо шэнжэлэлгын музейн захирал мэдээсэнэ.

Энэ нигүүлэсхы сэдьхэлэй хэмжээндэ Этномузей орожо харахын тула эмшэд болон волотернууд ажалайнгаа газарта буулгаһан дүрэ зурагаа харуулха зэргэтэй. Үгы гэбэл, ажалайнгаа үнэмшэлгэ харуулхада болоно.

Энэ буянтай хэмжээ ябуулга шэнэ жэлэй гаратар үргэлжэлхэ. Тиимэһээ эмшэд болон һайн дураараа хүн зондо туһалдаг эрхэтэд иишээ ерэжэ амарха, сэбэр, жабартайхан агаараар амилжа, ухаан бодолоо арюудхаха аргатай болобо.