Буряад Уласта арһа элдэлгын чемпионат үнгэргэгдэхэнь

Хониной, ямаанай арһа элдэлгээр Буряад Уласай гурбадахи мүрысөөн декабриин арбан зургаанда онлайн аргаар эмхидхэгдэхэнь.

Хабаадагшад ажалайнгаа видео буулгажа, шүүгшэдэй анхаралда дурадхаха болоно. Эдэнэр ганса хониной, ямаанай  арһа элдэхэһээ гадна буряадуудай заншалта дэгэл оёхо шадалаа харуулха аргатай. Энэ мүрысөө байкалфолк.рф. интернет хаягаар орожо, хараха арга байха.

Урда мүрысөөндэ амжалта туйлаһан Валерий Миронов баримта фильм буулгажа, арһа элдэхэ арга боломжоёо олондо харуулжа, дүй дүршэлөөрөө хубаалдаба. Уран гартан Ивалгын дасанай дэргэдэхи мастерскайда ажалладаг юм. Һайнаар элдэгдэһэн арһаар зохид, дулаан малгайнууд, бээлэйнүүд бусад хубсаһан оёгдодог гэжэ тэрэ онсо тэмдэглэнэ.