432
Ород Уласай соёлой сайдай орлогшо Ольга Ярилова, Россиин гүрэнэй номой сангай захирал Владимир Дуда гэгшэд Буряад Уласай түлөөлэгшэдые энэ ехэ баярта ушараар амаршалба. Нээгдэһэн номой сан Буряад орондо шэнэ түхэлөөр, мүнөө үеын оньһон техникэтэй, үргэн арга боломжотой байшангуудай зургаадахиниинь болоно гэжэ онсолмоор. «Соёл» гэһэн үндэһэн түсэлэй аргаар Улаан-Үдэ хотын 113-дахи кварталда номой сан һэльбэн шэнэлэгдэжэ, үүдэеэ нээжэ, олон уншагшадаа дахин угтаба.
Хотын 12-дохи номой сангай таһагта хамтадаа 12 гаран сая түхэриг һомологдожо, бүхы эрилтэнүүдтэ таарама зохид байшан бэлдэгдэбэ. Олон уншагшадые багтааха танхим, хүүгэдэй наадаха интерактивна хэрэгсэлнүүдтэй таһаг, интернет-таһаг ехэ зохидоор түхеэрэгдээ. Тиин эрэмдэг бэетэй үхибүүд өөһэдөө номой сангай байшан соо ябаха, дуратай номоо хараха аргатай болоһониинь ехэ һайн гээд баярай ёһололдо ерэһэн айлшад тэмдэглэнэ.
113-дахи кварталай зонтой баярыень хубаалдахаяа Буряад Уласай Толгойлогшо Алексей Цыденов, Соёлой сайд Соёлма Дагаева, хотын мэрэй 1-дэхи орлогшо Олег Екимовский гэгшэд ерээ.
2019 ондо «Соёл» гэһэн үндэһэн түсэлөөр Улаан-Үдэ хотодо болон уласай дүрбэн аймагуудта шэнэ түхэлэй номой сангууд нээгдэһэн байна. Ород Улас дотор 2024 он болотор 746 номой сангууд һэльбэн шэнэлэгдэжэ, модельнэ стандартада тааруулагдаха болоно.
Фото: egov-buryatia.ru/minkult
