​Буряадай Хориин аймагай Удинск тосхондо соёлой байшан һэльбэн шэнэлэгдэбэ

Заһабарилгын ажал «Соёл» гэһэн үндэһэн түсэлэй хэмжээндэ бэелүүлэгдэбэ. Эдэ үдэрнүүдтэ Буряад Уласай соёлой яаманай сайд Соелма Дагаева Хориин аймагаар ябажа, энэ жэлэй туршада хэгдэһэн ажалай дүнгүүдые хинан шалгаба. Тэрэнэй тоодо Удинск тосхоной соёлой байшан хүрөөд гараһан байна.

Нютагай һомон дарга Виктор Будажапов шэнэлэгдэһэн соёлой байшан тухай хөөрэжэ үгэбэ. Тэрэнэй хэлэһээр, аяар 1978 ондо баригдаһан соёлой байшан дахин шэнэлэгдэхээр болоод байгаа юм. Урда жэлнүүдтэ нютагай ТОС-уудай хүсөөр заһабарилгын ажал хэгдэжэ, бага зэргэ өөдэ татагдаад байгаа. Энэ жэл гүрэнэй жасаһаа 1,4 сая түхэриг һомологдожо, ехэ ажал хэгдэбэ.  Хоёр дабхартай байшанай үүдэ үрхэнь һэлгэгдэжэ, досоохи хана болон шалануудынь шэнэлэгдээ. Хамагай шухала асуудалынь байшанай хушалта байһан юм. Зунай хура бороогой үедэ хуушарһан хушалтань уһа нойто тогтоохоо болижо, соёлой хүдэлмэрилэгшэдтэ ехэ һаад ушаруулдаг һэн. Мүнөө энэ бэрхэшээлнүүд усадхагдажа, 700 ажаһуугшатай тосхоной соёлой байшан үүдээ сэлижэ, айлшадаа угтана. Нютагай номой сан, түүхын музей, тоглолтын танхим болон уран бүтээлшэдэй бүлгэмүүдэй таһаг энэ байшан соо байрладаг. Тиимэһээ энэ байшан тосхоной ажабайдалда асари ехэ үүргэ дүүргэнэ гээд хэлэлтэй.

«Соёлой байшангууд һэльбэн шэнэлэгдэжэ, бодхоон һэргээгдэжэ байхадань минии сэдьхэл баяр баясхалангаар дүүрэн байдаг. Бидэ арад зонойнгоо түлөө оролдожо хүдэлнэбди. Эсэсэй эсэстэ хүн бүхэн аза жаргалтай, амгалан тэнюун оршондо ажаһууха хүсэлтэй байдаг ха юм», - гээд, Буряад Уласай соелой яаманай сайд Соелма Дагаева хэлэбэ.

Гэхэ зуура, «Соёл» гэһэн үндэһэтэнэй түсэлэй хэмжээндэ Хориин аймагай Тээгдэ тосхоной соёлой байшан баһал заһабарилагдаа. Энэ жэлэй туршада Буряад Уласай хүдөө нютагуудай 14 соёлой байшан һэльбэн шэнэлэгдэһэн байна.